L`hombri qu`ensimentaba árbulis (5)

Paecía tamién que la natura hezo, de la su manu, un güen qué de cambéos y reaicionis, onqui él no las prisiguía, pos sólu siguía con tasuguez y cincillez el su trabaju. Cuandu tornemos al pueblu, vi augua corriendo enas rullegas que manierin ensuchas ena moroya de la genti d`aquella zona. Esti jue el surtir mas impresionanti de tolas reaicionis: los regatos ensuchos va mucha tiempu, cuerrían abora con un calci d`augua frescu. Daque de los pueblos lóndrigos estaban asitiáos en sitios ondi los romanos costruerin los sus pobláos, cuyos trazos entá siguían. Y arqueólogos que desplorarin la zona, atoparin anzuelos ondi nel siglu XX atanguaban aljibes pa garantizar un mínimu d`augua.

El vientu tamién audó a desparder granas. Y al empar que resurdió l`augua, tamién lo hicierin los salcis, fluncos, práos, jardinis, floris y l`ite pa desistir. Peru la tresformación desenrollose tan pocapocu, que jue asumía ensín causar asombru. Cazaoris trespusiendo la jarba escarceando liebres u jabalinis, notarin nitiamenti el medrar de súpitu d`arbolucos, peru cudaban qu`era un caprichu de la natura. En tóa manera, naidi jue un meticón col trabaju de Elzeard Bouffier. De ser detectáu, tindría genti repucháu. Peru era envisibli. Dengún moraor de los pueblos, ne naidi de l`alministración de la pruvincia maginó una dablura tan manífica y cuntina.

Pa tenir una idea mas nitia d`esti descecional carauter no hai d`olvidar qu`Elzeard trabajó en solidez talmenti, tan atal que cancia la final de la su vida esmanó l`usu de parlar, quizáes porque no atanguaba parlar.

Nel añu 1.933 lu visitó un guardamontis que lu avisó d`una orden pruhibiendo encesar juéu, por miéu a perigrar el medre d`esti boscu natural. Esta era la primer vegáa -dijó`l guardamontis- que vió surdir un boscu despontáneu. Nesi momentu, Bouffier cudaba ensimentar jayas nun sitiu a 12 km. de la su casa, y pa cesiar las güeltas (tinía entós 75 años d`edá), emplanteó costruir una cabaña de piedra nel plantíu. Asina lo hezo al añu derréu.

Sigui...