L`hombri qu`ensimentaba árbulis (4)

Un añu depués espenzó la Primer Guerra Mundial, ena que yo juí enroláu duranti cincu años. Un “soldáu d`enfantería” áinas tién tiempu de cudar n`árbolis, y la verdá, la cosa en sí hezo poca ñácara ena mi moroya. La consideré al simen d`un apetegu, apaicíu a una colición d`estampas, y olvidelo.

Al finar la guerra solo tinía dos cosas: un sustipendiu por la licencia, y un gran anjéu d`alendar airi frescu por un tiempu. Y parezme, que con talmenti esi aquel cuejí otra vegáa`l caminu alanti cancia la “tierra estiel”.

El paisaji no cambeó, pola escontra, detar del casar abandonáu, vi allá lantón una clas d`urbayu gris qu`atotogaba los picos de las montañas comu un sallalinu. El día enantis espencé de súpitu a alcanzame del pastor qu`ensimentaba árbolis. “Diezmil cajigas –cudaba- acupan un astragu rialmenti destensu”. Comu estaba amezáu a ver morrer a hombris asgaya naquellos cincu años, no asperaba atopar a Elzeard Bouffier vivu, especialmente porque a los venti años un tién a los hombris de mas de cincuenta comu presonas viejas hiciéndose pa morrer… Peru no estaba muertu, sino tolo escontrariu: amejaba gran agilidá y claridá; cambeó las sus acupacionis y abora tinía talmenti cuatru güejas, peru pola escontra, un cientu de dujos. Quitó las güejas porque acemangaban los arbolucos. Díjome –y vi por mi mesmu- que la guerra no lu molenzó n`asolutu. Cuntinó plantando árbulis emperturbablementi. Las cajigas de 1.910 tinían entós diez años y eran mas altas que cualisquier de nos. Ofrecían un despetáculu impresionanti. Quedeme buzabiertu, y comu él tampocu parlaba, pasemos el día n`enteru silenciu pol su boscu. Las tres jazas midían onci kilómetros de largu y tres d`anchu. Al alcanzame de que tóu estu surdió de las manos y l`alma d`un hombri atal, ensín arrecursos téunicos, un, caía`n cuenta de que los humanos son pa ser efeutivos en tréminos repucháos a los del destajamientu…

Continó nel su plan, y jayas de mas altor que los mis hombralis, espurrías jasta`l linti de la visual, lo confirmaban. Amostrome esgonces de gran beldá, con abidulis ensimentáos hicía cincu años (en 1.915), cuandu yo aluchaba enos campos de Verdún. Plantolos en tolas vallejas enas que camientaba –acertáamenti- que bía humedanza cuasi al rasolís de la tierra. Eran delicáos comu mozas, y estaban amás mu bien asentáos.

Sigui...