Los frisuelos de Mama Panya (y 3)

-Veni, Adika, no te desapartis de mí. Mos queda namás que p`ascar un pimientu picanti.

-Yo, mama, yo destriaré unu bien guapu.

-¡No, Adika! -desclamó la su madri, peru Adika ya diba pol puestu d`especies de Rafiki Kaya. Mama Panya allegó lo justu pa sentir:

-Esta nuechi la mi mama jadrá frisuelos. ¿Vindrás?

-¡M`encantaría! -retrucó Kaya, y cuegió la moneda de la manu de Mama Panya y trucóla pol pimientu mas tresnáu de tóos ellos-. ¡Es justu lo que val! Gracias por convidame.

Mama Panya sospiró.

Marcharin a casa.

¿A cuánta genti convidesti a comer frisuelos esta nuechi?

Adika, que comu siempri diba por lanti, retrucó contentu:

-A tolos nuestros amigos, mama.

Mama Panya puso un coloñu de quimas y maeras ena joraca del juéu. Adika jue a buscu d`un calderu d`augua. La madri trizó`l pimientu picanti ena tartera enanque Adika echaba un pocu d`augua n`ella. Añidierin tola jarina, regolvierin bien y vierin que no sobraría náa. Mama Panya echó un pociyucu ena sartén calienti de la lumbri.

Sawandi y Naiman allegarin los primeros y dijerin "¡Hodi!".

Adika retrucó "Karibu" pa oldealos. Los neños apurrían dos calabazas con lechi y un pocu de manteca metíu nuna cuerna de vaca.

-Mama Panya, esto mos sobró de cillar las vacas.

Mzee Odolo no uyó n`allegar.

-Hui el vieju Zambezi mos dió tres pejes.

Depués allegó Gamila con un recimu de plátanos ena capeza:

-Mecin bien conos frisuelos.

Bibi y Bwana Zawenna trijerin otra bolsa de jarina y dierinselo a Adika:

-Guárdalo pa otra ocasión.

Rafiki Kaya allegó con una mozáa de sal y cardamomos, y cona su mbira escolgando.

Y la fiesta espenzó con tol mundu asentáu sol baobab y col sinciu de comese los frisuelos que jezo Mama Panya.

Depués, Kaya tocó la mbira y Mzee Odolo cantó, onqui esgrijaba un pocu.

Adika sospiró, conos güejos brillantis y una sonrisa ena cara:

-Sé que diquiá pocu golverás a jacer frisuelos, mama.

Mama Panya sonrió:

-Sí, Adika, unos pocos y daque mas

Mary y Rich Chamberlin/Julia Cairns

Intermón Oxfam 2005

Los frisuelos de Mama Panya (2)

Nel mercáu bía genti a esgaya ascando y vendiendo fruta, especies, verduras. Adika atopóse con una amiga del colegiu, Gamila, nel su puestu de plátanos.

-Mama, los frisuelos son el su platu preferíu.

-Eh, eh... no quedrás que...

Peru enantis de ser pa finar, Adika ya marchó a saludala. La madri intentó galgalu, peru sólu jue p`allegar a sentir:

-¿Verdá que vindrás?
-Caru -retrucó Gamila.

Mama Panya jincó la miráa n`Adika y depués cuegiólu de la manu y llevóselu dando un jalón.

-Mama, sedremos pa espurrir la jarina.

-¡Ai, jumíu! ¿cuántu creis que sedremos pa espurrilo?

Adika saludó cona manu a anguien.

-Un pocu y daque mas.

Nel puestu de jarina, Mama Panya dijo:

-Adika, asiéntate aquí.

Depués de saludar a Bibi y Bwana Zawenna, Mama Panya entrugó:

-¿Cuánta jarina me dais a trucu?

Y apurrió la mas grande de las dos monedas a Bwana Zawenna, qu`echó un tangue de jarina nuna bolsa de papel d`estraza. Adika dijo de supitu:

-Mama hui jadrá frisuelos. ¿Querís vinir?

-Sí. ¡Qué bien! Paezme que pol mesmu preciu vos daremos un pocu mas.

Y Bibi Zawenna añidió otru tangue de jarina a la bolsa, y depués amarrólo con una cuerduca.

-Mos veremos esta nuechi.

Mama Panya guardó la bolsa de jarina.

-¡Ai, siñor! Tindremos suerti tú y yo si semos pa comemos un frisuelu a meyas.

-Peru, mama, si tenemos un pocu y daque mas.

Sigui...

Los frisuelos de Mama Panya (1)

Mama Panya cantaba enanque apagaba la lumbri del amuerzu echando sable por cima col su pie descalzu.

-Adika, amos, a jita -díjole parcialmenti-. Hui tenemos de dir al mercáu.

-¡Sorpresa! Te gané, mama.

Adika taba ena puerta, cona camisa mas guapa y los pantalonis mas limpios.

-¡Ya estoi!

Era Mama Panya la que tinía d`escorrease.

Depués d`acaldar los haberíos, apañar una cestaña y calzase unas sandalias, Mama Panya dijo:

-Yo tamién estoi compuesta, Adika. ¿Ú estás?

-Estoi aquí, mama, te gané.

Adika taba asentáu en baju del baobab, cona picaya de Mama Panya ena manu.

-Ah, ya te veo.

Mama Panya cuegió la picaya y ensemble marcharin al mercáu.

-¿Qué mercarás, mama?

-Un pocu d`estu y un daque mas de lo otru.

- Mama, ¿hui jadrás frisuelos?

-Eris mas listu qu`una bonuca galana. ¡No hai móu de sorpriendeti!

-¡Empusibli! ¿Cuántas jadrás?

Mama Panya poló conas polpas de los deos los dos chines atotogaos pol pañuelu que tinía ena petrera.

-Unas pocas y daque mas.

Trés un requeju del caminu, vierin a Mzee Odolo asentáu ena lera del ríu.

-¿Habari za asubuhi? (¿Tóo bien pola mañana?) -entrugó la madri en soniche pa no asustar a los pejes, peru Adika dijo grijando:

-Esta nuechi jadremos frisuelos. ¡Veni, Mzee!

-Adika -díjole Mama Panya al ascuchu.

Mzee Odolo dijo adios cona manu y dijo:

-Asante sana (gracias).

Mama Panya escorreóse.

-Tiníemos de convidalu -dijo Adika-. Es el nuestru amigu mas vieju.

-Venga, a jita, que te quedas por detar -retrucó Mama Panya.

-Mira, mama, son Sawandi y Naiman.

Los amigos d`Adika daban conas aijáas a las vacas p`arrealas.

-Voi por lanti, mama.

-¡Aspera, Adika! -díjo la sus madri.

Mama Panya no bía alvanzáu muchu cuandu Adika jue p`asganzala y dir al empar.

-Están mui contentos de vinir -dijo Adika anjeando.

Mama Panya puso viecu cudando nel dineru que tinía nel pañuelu.

-¡Oh! Encontóo, ¿cuántos sedremos?

-A ver, Sawandi, Naiman, tú y yo -hezo contaeru Adika-. Y con Mzee Odolo semos cincu.

-¡Vae! ¿Cuántos frisuelos creis que tindré de jacer hui, jumíu?

-Unos pocas y daque mas.

Sigui...

Los tres pelos d`oru (y 2)

Dientru bía una viejuca aseláa a la vera`l llar encesu. La vieja apurriólu a la calor, ateclólu y púsolu nel su somantu. Caltúvolu aneándolu al simen d`una madri col su bebé. Allá quedarin ellos, el probe vieju qu`era tóu pelleju y güesos y, la vieja tresnáa, aselanti y oldeanti. Allá quedarin mientres la vieja lu obaba dijendo: “Oba, oba, no pasa náa”.

Tola nuechi estuvo arrunándolu y, a la raita`l sol, el vieju amozó y abora era un mozu galán col pelu doráu y robráos miembros. Peru la vieja lu siguía aneando: “Oba, oba, no pasa náa”.

Al albiar, la vieja siguía obando y, aquel mozu convirtióse nun neñu de melena cuspía al trigu doráu.

Cuasi nel remanecer, la vieja arrancólu supitamenti tres pelos de la guapa melena del neñu y tirólos al suelu. Los pelos hicierin: “¡Tiiiiiiing!¡Tiiiiiiiing!¡Tiiiiiiiiing!”

Y el neñucu, que siguía nel somantu de la vieja, abajóse y jue arronti a la puerta, galaneando. Arrecatóse una alendáa y, trés sonriir a la vieja, najó la casa y esquiló al cielo pa ser el latagudu sol matinal.

Tradicional de Rusia

Los tres pelos d`oru (1)

Bía una vegáa, hebo una vegáa nuna lóndriga y jonda nuechi, una d`esas nuechis enas que la tierra es de color negra y los árbulis paecin unas ñudosas manos escontra`l trelumbranti cielu azul escuru, nuna nuechi cuspía a ésta un vieju trevesaba`l boscu con pasu tatencianti y en solidez. Onqui las quimas de los árbulis lu mancaban la cara y meyu lu cegaban, él caltenía por riba una lanterna. Dientru del candil, la vela encesa díbase finando pocapocu.

El vieju era tóu un despetáculu col su largu pelu amarillu, la su amarilla dentambre meyu pocha y, las sus uñas de color ámbar. Tinía la espalda tan cambáa comu una quilma de jarina y, era tan vieju que la piel escolgaba del garguelu, los brazos y las caeras.

El vieju alvanzaba al treviés del boscu, garrándose a un avillanu pa dase umpía, emburrando del cuerpu cancia lanti y asina dir garrando otru avillanu; con esta muvición cuasi de remu y col pocu aliendu que tinía, siguía pol su caminu alanti.

Tolos güesos del cuerpu alampábanlu cona dolor de la rumera. Las nuéticas de los árbulis sullaban arrentando`l ruíu de los sus gonces rumerosos cuandu andaba ena escuridá. Allá lantón candilitiaba una luzuca, una casuca, un juéu, un llar, un asubiu. Ensín aliendu allegó a la puerta, abrióla y la vela s`apagó. Él cayó al suelu de cansu que diba.

Sigui...

Demetra y Baubo (y 3)

La bailaora, Baubo, era rialmenti un prodigiu pos de la su boca surdían hestorias y cuentos coloraos mui sorgosos. Demetra río y río, destañando nunas cascajáas que surdían del jondu del su ser. Ambas mojeris, la gran diosa de la fertilidá de la tierra y la pequeñuca diosa de la nación parlanti, rierin comu relochas.

Aquella risa arrescató a Demetra del su acolechamientu, del coloñu nel qu`estaba, dándole correa enforma pa siguir l`escarcéu de la su jía y, cona auda de Baubo y Hermes pescudarin a Helios, l`astru solar, y ésti díjoles óndi taba prisionera Perséfone. Zeus, cansu d`un mundu estiel, acemangó a Hades y obligólu a soltala. Ésti, alcedió peru cona condición de que no comiese náa ena güelta. Perséfone comió una granáa con seis granas.

Trés poner n`abertal a Perséfone, el mundu, la tierra y las naciones d`alimalis y mojeris golvierin a tener fertilidá, peru Perséfone tendría de dir a Los Profundos seis mesis al añu, unu por cáa pipa de granáa. Los mesis fríos.

Clarissa Pinkola Estés

Mojeris que cuerrin conos lobos

Edit. Zeta

Demetra y Baubo (2)

No hebo móu d`alcontrar a Perséfone y, en toa manera, Demetra espenzó l`escarcéu de la su quisía jía por dellos mesis. Taba descuajáa, pujitianti, berrona, pescudanti; diba a buscu por tolos esgonces de la tierra por riba, por baju, por dientru. Pidió morrer, por compasión, a trucu de la su jía. No jue p`alcontrala.

Ella, qu`era la diosa de las cojechas, de la nacencia de los frutos, dió un maldáu a tolas tierras del mundu, grijando con dolor dijo: "¡Morréi! ¡Morréi! ¡Morréi"

No hebo nacencia de dengún neñu, de denguna creatura, no brenó`l trigu, no hebo flores pa las fiestas ne quimas pa los muertos. Tóo quedó ataláu y ruvieju ena tierra estiel y enos pechos ensuchos.

Enclusen la mesma Demetra ya no se ribiaba, ya no se bañaba. Las sus túnicas taban ñacaráas de barru y el pelu paecía rozu. Ne cona cordial que sofría allegó a dase, y siguía escarceando a Perséfone. Pescudaba ensín cesía por pueblos y pagüenzos, enas islas y puertos. Depués de tantu aluche escontra`l distinu, Demetra diba nuna dea, al pintís del acolechamientu, contiáa namás que por un jilu d`asperanza; y ésti ibróse un día mientres bibía un suerbu d`augua nun pozu. Demetra vió l`arreflezu suyu nel augua y vió a una mojer aviejáa, entrequidenti y, cayó ensín aliendu pa siguir a buscu de Perséfone.

De súpitu, pareció una especie de mojer d`enti unos matos. Bailaba y cantaba esmengando las caeras comu si estuviera ringlando y, los sus pechos boyeaban al empar de la danza. Tinía una melena larga que surdía de los hombralis, caendo polos laos del su cuerpu chaparretu y sobri l`harpa que tocaba. Los güejos estaban enos mamucis de los pechos, la nariz nel umblígu y, la voz tatareanti surdía de la nación.

Al vela, Demetra no jue pa galgar la cascajáa.

Sigui...

Demetra y Baubo (1)

Demetra -u Deméter-, era la diosa de las cojechas, de la tierra (no del planeta) y de la fertilidá agrícola. Un día, ésta, diba cona su jía Perséfone por un práu y, de súpitu, la neña atopó una flor jermosísima. La neña puló la flor y, comu era tan guapa y de tala color esconocía, finó por cuertala. Súpitamenti l`astragu del suelu espenzó a dar sacudiatos y a abrise una resquiebra que diba nantando alredor de Perséfone. Del jondu de la tierra surdió Hades, el dios de Los Profundos. Era altu y jampudu y, manía nun carru negru con cuatru caballos de color pantasmal.

Hades garró a Perséfone y apurrióla al su carru nun michorcu de grijos, velos y sandalias. Depués, los caballos catroparin a Los Profundos de la tierra. Los grijos de Perséfone diban esmanándose enanque, pocapocu, la tierra piesllaba la resquiebra y l`astragu quedaba comu si náa socediese.

Los grijos y pujiteos de la moza retinglaban polas garmas, polas vargas, polas montañas, polos ríos; y a la final, remanijarin dendi`l jondu la mar. Demetra sintió grijar a las piedras. Sintió grijar a la tierra pindiu. Sintió grijar a las esquientas. Sintió grijar a los cudonis del ríu; y a la final, sintió grijar a los garranchos. Depués, un mostruosu silenciu coronó tola tierra.

Demetra arrancóse la corona de flores del su pelu enmortal y espurriendo los velos qu`atotogaban los sus hombralis, voló sobri la tierra al simen d`un ave giganti, escarceando y apeldando a la su jía.

Los seris que moran ena tierra, nel airi y ena mar, sintierin esi día tres grijos: el griju d`una moza aterrecía; otru, una apeldáa sofrienti y apeldanti; y el tercer, el pujitéu d`una madri.

Sigui...

Mojeris que cuerrin conos lobos

Clarissa Pinkola Estés

Esti es un cuentu libráu pola autora del libru, poínase enos diosis griegos, peru no es un relate de la mitología griegu qu`allegui a nos.

Esta tradución es libri y, premitíme añidir y quitar dellas cosas del testu original.

El vuelu del colibrín

Esta es la hestoria del gran boscu que s`alampó. Las despiadáas llapas rutaban y atalaban. Los alimalis no usarin y ajuyerin de las sus joracas. L`elefante y el tigre, el castor y l`osu, tóos ellos pescarin a correr, enanque, sobri las sus capezas, volaban aterrecíos los pájaros. Ajunárinse nel pintís del boscu y oservarin el desastri. Acurriárinse tolas criaturas, menos una. Dukdukdiya, el colibrín, jue l`únicu que repuchóse a najar el boscu.

Dukdukdiya voló a escapi jasta la rullega y apañó una gotuca d`augua col picu. Dukdukdiya tornó al boscu encesu y espibló la gota d`augua enas llapas. Voló otra vegáa a la rullega y apañó otra gota, y asina siguió, diendo y viniendo, diendo y viniendo col augua.

Los demás alimalis oservaban el chicucu cuerpu de Dukdukdiya, que volaba pesi al giganti juéu, y sofrían. Apeldaban grijando al colibrín p`alvertile de los perígros del jumu y la calor.

-¿Qué voi a jacer yo? -pujiteó la liebre-. El juéu es ulsanti.

-¡Y hai mucha jumu! -agulló`l lobu.

-¡M`alamparé las alas! ¡Y tengo`l picu mui chicu! -grijó`l búu.

Peru l`humildi colibrín siguió col su labarientu. Volaba a la rullega, apañaba una gota d`augua y echábala nel boscu encesu col su picucu, y entós, golvía a espenzar otra vegáa.

A la final, el gran osu pescudólu:

-Dukdukdiya, ¿qué jacis?

Ensín aparase, Dukdukdiya abajó la capeza cancia los demás alimalis que lu oservaban y dijo:

-Jago lo que soi pa.

Michael Nicoll Yahgulanaas

El vuelu del colibrín

Edit. Oceanu 2008

De cómu nació la moroya del Boscu (y 3)

Naide quisía una vieja, tisnáa y cojitranca mesa ulsáa, en toa manera que la echarin al jateral.

Allí aprendió l`agolor de las flores pochas, los arañatos de los tangues entoñaos y el pular d`un jargón de lana rajáu.

Una pareja alcontró la mesa y apurrióla a la su casa. Ésta era tan chica que tuvierin de cuertale las patas. Comu era l`únicu haberíu que tinían, allí cumían, escribían, rutaban y riían.

La vida y l`azar llevarin a la jía de la pareja a vivir juntana del boscu del serrón.

Allí la mesa golvió a sintir el burbur del oral enti los árbulis y l`agolor de la tierra húmedu y, entós, escomencipiarin a surdir pugucas y depués armuellos. Nacierin tantas quimas y tan jarbosas qu`allegó a confundise col boscu juntanu, ondi apurrióla la jía.

La jía deprendió qu`una presona sola es pa caltener vivu al boscu. Y decidió dejar moroya d`esta hestoria.

Apañó papel y, conos sus pincelis, hezo un libru. A hucias del libru, los sus jíos, nietos y bisnietos sintin El Boscu comu suyu.

De cómu nació la moroya de El Boscu

Rocío Martínez

Edit. FCE Méjicu 2007

De cómu nació la moroya del Boscu (2)

Peru aquel lecheru no diba a quitar esa vaca, en toa manera qu`apurrió la mesa al vendeor, y ésti, agraecíu, dióle tres ollas nuéas.

El vendeor puso una pesa ena vieja mesa cojitranca... Conos años, y cona mesa coja, hezo tresnar esi negociu y mercó una mesa mayor.

Comu ya no cuegían las dos mesas, dejó que la su sobrina llevase la vieja. Ella, agraecía, adeicólu tres sinceros versos.

La sobrina del vendeor marchó a la ciudá cona mesa. Pintóla d`azul y puso un calentaor con remuellas so la mesa. Calentábase enas tarducas d`iviernu enanque escribía cartas d`amor. Peru una nuechi l`apareju quedó encesu y alampó la casa.

Sigui...

De cómu nació la moroya del Boscu (1)

Bía una vegáa, hebo una vegáa un serrón que vivía nel boscu. El serrón sintíalo comu suyu porque jugó n`él, amó n`él, y las sus quimas asubiárinlu de la chuvia y la calor.

El serrón era jíu y nietu de serronis y d`ellos deprendió qu`un hombri sólu es pa jacer descastar un boscu. En toa manera, cuandu allegó`l momentu, egual que los sus mayoris, ensimentó un árbul y, al domblar ésti la su altor, dejó l`oficiu.

N`alcordanza de lo que bía síu, cuertó un árbul, serró la maera y costruyó una cincía mesa. La mesa y él aviejarin en compaña. Sobri ella comía`l serrón, riía, echaba la partida, echaba una parláa col su jíu y echaba una cantáa conos amigos. Dendi la su mesa contemplaba`l boscu y, sobri ella morrió.

El jíu del serrón sintía tanta tristura cuandu miraba la mesa que se la dió al panaleru. Ésti, agraecíu, dióle tres prestosos panis.

Duranti años el panaleru mansó la jarina y puso los arrescendientis panis ajornaos ena mesa, jasta que los sus brazos no juerin pa trebajar mas.

Jue entós cuandu la vieja mesa pasó al lecheru que, agraecíu dióle nata prestosu pa jacer tres güenos pastelis. El lecheru pusía las perolas combláas de lechi recién cilláu ena mesa pa qu`el gatu no lo asganzase. Peru una vaca cuegió la zuna d`escarramanalo col rabu.

Sigui...

Los cuatru rabinos

Una nuechi cuatru rabinos recibierin la vesita d`un ángel que los despertó y apurriólos al Siétimu Tombu del Siétimu Cielu. Dendi allí daban vista a la Rueda d`Ezequiel.

En bajando del Pardes -el Paraisu- a la Tierra, un de los rabinos s`enrelochó. Esmanó`l juiciu y echando gorgorllitos pola boca carriló pol cielu jasta la final de la su vida. El sigundu rabinu era puntu mas cínicu: "Namás que vi la Rueda d`Ezequiel nun sueñu. No aconteció náa rialmenti". El tercer rabinu parletaba ensín agutar, no galgaba de dicir lo que vió. Taba osesináu y cuntaba cómu estaba jechu`l paraisu, lo que sinificaba, la su importancia... jasta que, a la final, s`escabildró y traicionó la su fe. El cuartu rabinu, qu`era poeta, apañó un papel y una pluma, asentóse so un olivu y escribió cantíu trés cantíu atentu la palomba qu`estaba nuna quima, la su jiuca nel ron y, atentu tolas estrellas del cielu. D`esti móu vivió la su vida mijor qu`enantis.

La calabaza y el maru (y 2)

Kalba esgarabitó a la jóndriga de la tierra y trespuso por una cambera de grija que diba al treviés d`una llana de la color del jierru. Nel cielu de piedra bía un latagudu solucu de cudón. No jue pa dicir cuánta tiempu cambaleó, pos el sol de cudón de la jóndriga de la tierra no acaez enjamás, peru los sus pies estaban cansos de tantu andar, y jorrastraba. Entós, a la final de la pista pareció una cabaña d`oru. La mojer taba tan jelona que p`averase jasta ella tuvo d`arrastrase a gatas pol suelu. Emburró la puerta de la cabaña d`oru y nel centru del cuartu reondu vió un maru asentáu enas patas detraseras; un marón de melena coloráa, con cuernas color llapa enrrolláas nel pezu. Miró a Kalba apastrajáa a los sus pies y dijo: "¿Qué vienis a jacer aquí, mojer del país d`arriba?". Kalba desplicó que vinía por un mandáu de la vieja del su pueblu, pa qu`el maru suba al mundu de los d`arriba. "Subi al mi llombu", dijo`l maru. Y los dos anajarin al astragu de la tierra. Allí estaba la herba verdi, los árbulis y el cielu azuláu. El marón catropó cancia`l pobláu, posó a Kalba nel chozu de la vieja bruja y entró mui dinu nel cuartu. La bruja oldeólu y espenzó a cantar. Conas manos abierta por lanti la cara, cuntó tolas otomías jechas pola calabaza. El maru divinu sullaba y resullaba a mas que mas remoscu. Los cantíos de la vieja encesaban jumeras ena su nariz y pusían albas las sus cuernas comu si jueran remuellas. Butiju, arrascó nel suelu cona su cazuña y marchó, con inflas, carrejeando pol pobláu, en compaña del cantíu de la bruja. Allá, nel casar ondi estaba la calabaza. Despertóse y púsosé a ruar p`atopar al maru; ésti emburró escontra ella zamostando. El golpatu jue tan mostruosu que l`estañíu oyóse enas estrellas. El maru divinu, egual qu`un murrillu lanzáu al airi, esmanóse enos cielos, peru la calabaza ibróse al simen d`un güevu mauru y tolos quienis juerin mangullíos surdierin al mundu.

Peru ascuchái agora lo mas destrañu y maravillosu d`esta hestoria: ena jóndriga de la calabaza la genti taba tumbáu unos por cima d`otros, en cuatru capas. Los d`arriba son abora amarillos, los del sigundu astragu son los rosaos, los del tercer astragu son los coloraos y, los últimos, los quienis poinan el mundu, son negros. Esta es la verdá. Los quienis no lo crean son genti ciegu; náa comprendin de los guarismos del mundu.

Cuentu africanu

La calabaza y el maru (1)

D`aquella, al principiu de la humanidá, a la entráa del primer pueblu jechu pola manu del ser humanu, polos primeros humanos; bía una calabazona mostruosa. Cáa vegáa que s`averaba daque presona, la calabaza lu mangullía; abríase pola metá y, de súpitu, golvíase a piesllar cona presona aentru. Tola genti que se puso al láu de la calabaza finó cumía. La calabaza medraba y medraba y, la genti del pueblu diba descastándose, un trés otru, a la final no quedaba namás qu`una mojer llamáa Kalba, que vivía col su jíu nel boscu, y tamién una bruja tan vieja que ya no era pa anajar de la su choza.

Peru un día el jíu de Kalba escapó de la su madri, trespuso asechando alredor de la calabaza y ésta, que durmía con un sólu güeju zarráu, mangulló al neñu. Kalba, jalándose de los pelos y cuspiendo al cielu tol su dolor, marchó cancia la choza de la vieja bruja.

-Tienis d`audame a ibrar esa maldáa calabaza- dijo. -Quiero arrecuperar al mi jíu-.

La bruja, moviendo`l su déu guinchudu a petu la su cara, retrucó: "Probe jamía. Vo a dicite qué tiés de jacer. Ascucha bien: véi jasta ondi s`alcuentra`l sol de la tarduca; allí atoparás un jisu de piedra. Soba la piedra con esta guindilla que te doi y entós s`abrirá una puerta n`ella. Tindrás d`esgarabitar a la jóndriga de la tierra y cambalearás por ella jasta qu`atopis al maru divinu. Entós, tienis de dicile que yo te mando y le pidirás que venga cuntigu al nuestru pueblu, al sol de los vivos". Kalba dióle las gracias, apañó la guindilla y trespuso cancial sol de la tarduca. Cambaleó cancia l`acaecer. Cambaleó días y días, jasta qu`enti los herbatos aprendió un jisu gris, altu comu un giganti del caos. Sobó cona guindilla la piedra y, de súpitu sintió angu amejanti al estañíu d`una llampa: el jisu abrióse pocapocu pola metá.

Sigui...