Augua

¿Es acorde cudar que del relate d`una croeldá puéi surdir una visual combláa de beldá? Esta enterroga, que n`aparencia es una recontravición, hícemela va unas seimanas trés tastear una de las pelícolas mas jermosas que jui pa ver: Augua, de Deepa Mehta. Escribo, agora, de l`alcordanza d`aquella hestoria murria, pos no soi p`alcontrar l`escritu emocionáu qu`hici namás que finé de vela, tala era la emoción que sentí, y siento, al revivir una pelícola qu`es un dáu.

Singún la religión hindú, las viudas tienin tres posibilidaes al enviudar: casase col su cuñáu menor, soicidase u, caltener una vida d`islamientu y penitencia desapartáa del mundu. Son engucías a se jacer "muertas en vida".

Espienza la pelícola cona ceremoña de casoriu d`una neña d`ochu años y un hombri mortanu -esa mesma tardi muer- y, de súpitu, la neña es viuda, en toa manera qu`es dáa a un ashram de viudas ondi tindrá de vivir jasta la su muerti. El padri, l`enguaciaor de la boda, consigui nuna alendáa, tener d`acupase d`una boca menos. Esi es l`ojetivu benifiestu de tala siniquidá -digo, norma- religiosa: la "colomía" familiar.

A los ochu años, la neña no es pa entender qué socedi cona su vida, no entiendi l`abandonu, destraña tóo y no vei a jutu de qué tién d`estar nuna casucia con una colla de viudas méndigas. Tresquilan y afitan el su pelu, ibran los sus atabalis y es compuesta con una túnica blanca. Queda pieslláa nel ashram en compaña de mojeris muchu mayoris y mancáas pola su suerti, la tristura, la duendura y, enclusen, pola zuna. L`ashram es gris, egual que las sus vidas, egual que l`esiliu.

Pocapocu, la neña va amezándose a esa condena y deprendi la su condición de méndiga, de gurrufalla que no tién drechu a comer voquiblis comu los demás, aprendi que la su sembra es endina y que no tién de tocar a naidi. Ena India de 1938, sol yugu británicu, los indios son enferioris, enti ellos hai castas con diferientis frascas. D`enti las castas, las mojeris no valin náa. D`enti las mojeris, las viudas son menos que meya mojer y, ella, es menos que meya viuda por ser una neña. Tala es la su condición.

Deepa Mehta jaz un relate maníficu de la croeldá del distinu, de la familia y de la religión, peru, hácilo ensín caer ena vulgaridá, ena simplicidá. Hai un que prestosu enas imágenis, ena velocidá de l`aición, de la muvición, ena color, ena música jermosa y arrescendienti, enas caras y viecos; hai beldá ena tragedia... enas tragedias. Hai un ñudu que va dándose nel gargüelu al treviés de la pelícola y, que colombra -nel mi casu- cuandu, cancia la final de la hestoria, aparez Mahatma Gandhi ena ciudá a dar una espiche pola libertá de la India y, es oldeáu por dos neños a los quienis pola la su capeza conas sus manos ruviejas, bendijéndolos y dijendo: "Que seas feliz"... Vóime n`augua.