L`hombri qu`ensimentaba árbulis (2)

Diome un suerbu de la su calabaza-cantimplora, y pocu depués m`apurrió a la su cabaña asitiáa nuna belorza jormáa nel llanu. Surtíase d`augua –descelenti- nun pozu natural y jondu, enriba`l cual costruyó una primitiva garrucha.

L`hombri parlaba pocu, comu están amezáos los quienis vivin solos, peru sentí qu`estaba siguru de sí mesmu, y confiáu ena su seguranza. Pa mí, estu era sorpriendenti nesi país estiel. No vivía nuna cabaña sino nuna casuca jecha de piedra, amostraora del trabaju qu`él adeicó p`arranchar la roina qu`atopó cuandu allegó. El tejáu era juerti y soldu. Y l`airi, al sullar por riba d`él, amejaba`l son de los garranchos nel sable.

La casa estaba acaldáa, la vasija limpia, el suelu varríu, la cuspeta engrasáa, la su sopa jirviendo nel llar. Noté qu`estaba bien afitáu, que tolos sus butonis estaban bien cuesíos y que la su ropa jué remontáa bien curiosu, ascuendiendo las remontas. Compartimos la sopa, y depués, cuandu ofrecí la mi bolsa de tabacu, retrucó que no jumaba. El su perru, tan silenciosu comu él, era parcial ensín ser mu mañenti.

Dendi`l principiu dábase por descontáu que yo pasaría la nuechi allí. El pueblu más juntanu estaba a un día y meyu de distancia. Amás, ya conocía perfeutamenti la clas de pueblu d`aquella región… Bía cuatru u cincu mas d`ellos bien desparcíos polas vargas de las montañas, enti cajigalis, a la final de pistas polvoreras. Estaban moráas por cisqueros, cuya convivencia no era mu güena. Las familias, que vivían juntas y pretáas nun climen descesivamenti duru, tantu n`iviernu comu nel branu, no alcontraban solución al emparabli conflictu de presonalidáes. L`ambeción enracional allegaba a unas proporcionis desageráas, nel anjéu cuntinu d`escapar del ambienti. Los hombris vendían las sus carritillas de ciscu nel pueblu mas caberu de la zona y tornaban. Las presonalidáes mas recias limábanse enti la rutina cutiana. Las mujeres, pol su láu, enrobraban los sus rencoris. Desistía rivalidá en tóu, dendi`l preciu`l ciscu al banzu ena ilesia. Y por cima de tóu estaba`l vientu, tamién ensín cesía, que pusía los niervos encrepíos. Bían andancios de suicidios y casos de relochez, a minudu homicida.

Bía trescurríu una parti la veláa cuandu`l pastor jué a por una quilmuca de la qu`espadió una piluca de llandes ena mesa. Espenzó a miralas una a una, con gran concentración, desapartando las güenas de las malas. Yo jumaba ena mi pipa. Ofrecime p`audale, peru díjome qu`era`l su trabaju. De jechu, en viendo`l cuidu que pusía, no insistí. Esa jué tola nuestra conversación. Cuandu ya hebo destriáu una cantidá enforma de llandes güenas, las destrió de diez en diez, mientres diba quitando las mas chicas u las que tinían resquiezas, pos abora las desaminaba mas detuvíu. Cuandu destrió un cientu de llandes perfeutas, descansó y marchó a durmir.

Sentiase una gran paz estando con esi hombri, y al día derréu lu enterrogué si sedría pa quedame allí otru día mas. Él lo alcontró natural, u pa ser mas precisu, diome la sensación de que no bía náa que lu alterara. Yo no quisía quedame pa descansar, sino porque m`interesó esti hombri y quisía conocelu mijor. Él abrió`l corripiu y sacó la su recilla a pacer. Enantis de salir, puso a moju la quilma de llandes nun calderu d`augua.

Sigui...