Las mozas d`augua

Quizáes sean anjanas estas mozucas ruyas con una estrella ena rente. D`altor atraíu a una anjana, las mozas d`augua, comu declina`l su llamatu, vivin enos ríos, lláos, rullegas, juentes y camaráos. Vivin en palacios y casonas nel jondu l`augua, con grandis tresoros, dicin qué.

Gastan un sagu prateáu que las torna envisiblis enas auguas de los nuestros ríos, peru de cuandu en vez, salin a las leras y práos juntanos y, ensúganse enos esgonces soliegos. Es entós, esnugas, cuandu son visiblis pa nos, los humanos. Danzan y juegan dendi l`albiar y, espurrin enti las quimbas y bardas, jilos doráos que pola nuechi jilan de las lluetas d`oru que caltienin enos sus asubios anagáos. Si al deslai, una presona es pa jalar del chicote d`un d`esos jilos, sedrá una presona de gran ricura. Los sus pies descalzos son pa jacer surdir armuellos y floris en cáa una las sus esclaves.

Si una mozuca d`augua namórase d`un mozu humanu, ésta, pondrá una trampa con jilos doráos y cuandu`l mozu cueja el chicote del jilu, las mozas d`un jalón lu echarán al augua, ondi quedará pa siempri atecláu y jechizáu polas mozas. La nuechi de San Juan, el mozu sedrá pa salir y dejar un anillu nuna piedra. La presona qu`atope esi anillu, sedrá de güén cordial y güén jacer, tornándose dendi entós en Saludaora.