El viaji inaugural, de Gerald Durrell (2)

Margo y l`hombrucu siguin piesllaos nel sirviciu de siñoras del pior barcu turísticu de Grecia. La situación va de mazu`n calabazu.

-Por favor, contaor navíu -guitoneó l`hombrucu-. Por favor, alcontrar contaor navíu p`abrir puerta.

-Güenu, ¿y óndi sedremos p`atopalu? -entrugó Leslie-.

-Es ridículu por demás -dijo Madri- ¿Estás bien? Estati bien desapartáa d`él, jamía.

-Alcontrar contaor navíu n`oficina contaor navíu, primer cubierta -vocilgló`l prisioneru-.

Pa cualisquiera que no conoza`l carauter griegu y la su destraña habilidá pa trucar una situación talmenti normal nangu tan complicáu que trestorna`l juiciu anglosajón, la prósima escena sedrá encreibli. A nos, que conocíemos a los griegos, tamién mos lo paeció. Leslie tornó col contaor de navíu, que no sólu nantó l`arrescencia del sirviciu de siñoras cona su agolor a aju, sino qu`en rápida socesión felicitó a Larry por beber ouzo y a Leslie pol su acentu griegu, tranquilizó a Madri con un gran clavel que se quitó de la ureja, y depués dirigió tal garlu d`ensultos al probi hombrucu atrancáu cona mi jermana qu`unu asperaba que la puerta d`aceru soldu jundiérase d`un momentu a otru. Lanzóse escontra ella, dióla conos puches y dióle patáas. Depués tornóse cancia Madri y hezo una arreverencia.

-Madam -dijo sonriendo- no s`alarmi. La su jía está segura con una virgin.

Esta oservación dejó a Madri talmenti desintoriáa. Tornóse cancia mí a buscu de desplicación, pos Larry, que conocía d`antigu esta clas de tribiloriu, subió al bar p`apurrir angu de beber. Diji que cudaba que quisía dicir qu`estaría segura "comu" una virgin.

-No puéi querer dicir esu -dijo arrecelando- Tién dos neños.

Espencé a esmanar los niervos, comu paez enevitabli siempri que los griegos le desintorian a unu. Acababa d`alendar airi con una jondura emprudenti, col aquel d`apetame a una desplicación pa Madri, cuandu juí galgáu misericordiosamenti por tres pasajeras, tóas rústicas y enrobráas, con grandis petos, cambas tresnáas, bigote escripíu y ropal negru de tres tallas mas chicas, qu`arrescendían a la empar a aju, sudu y a daque perjume ajumpianti. Hiciérinse pasu a codazos enti Madri y yo, y entrarin nel sirviciu. Al ver al contaor del navíu, blincando de rabia y pucheando la puerta, apararin comu maníficos caballeros de guerra ufatiando una batalla.

Cualisquier mojer d`otra nacionalidá bría rutáu pola presencia`l contaor de navíu nesti santuariu de la jeminidá, ensín tomar en cuenta la mía por ser destranjeru, peru es nestu eno que los griegos desapártanse majamenti d`otros lazos humanos.

Supían qu`era una "SITUACIÓN", y esu es lo que los griegos aman por cima tóu. La presencia de tres hombris (si inclúin al envisibli trancáu con Margo) nel su sirviciu no era náa en comparanzas cona SITUACIÓN. Alumbrarin los sus güejos, surtierin los sus bigotes, y arrodiando al contaor de navíu al simen d`un alampáu moriu de carni, desigierin saber qué pasaba. Cumu suel soceder nuna SITUACIÓN, tóas parlaban a la empar. La temperatura`l sirviciu de siñoras subió a unos cuarenta gráos, y el vulume de ruíu hicía que la capeza diera güeltas, comu si daque presona tocara los momentos mas descandalosos de la "Cabalgata de las Valquirias" encima d`una carral de jierru.

Cuandu l`apuráu contaor de navíu hebo desplicáu los elementos de la SITUACIÓN, las tres mujeronas, compuestas conas reguñas d`un aluchaor profesional, lu desapartarin del meyu conas manos comu jorcas de guinchos escarlatas y espenzarin a arremangase las jaldas. Depués, echando estroniantis "¡Epa, epa!" zamostarin escontra la puerta`l sirviciu. En total tuvían de pesar alredor de cuatrocientos kilos de carni y güesu, peru la puerta era solda y las tres damas caerin al suelu jechas un coloñu. Erciérinse con dificultá y entós encetarin a esquerpar enti ellas atentu la mijor jorma d`estorregar la puerta`l sirviciu.

Una d`ellas, la menos pesáa de las tres, amostró`l su métodu -métodu ideal- arricomentiendo escontra la puerta d`otru los descusáos. Penosamenti, ésti no tinía`l piesllu dáu, asina qu`entró n`él con estrolliza y súpitu escape, y dióse un feu golpi nel mulsu al atopar escontra la baza. Onqui encontóo no amostró la su teoría, tomóselo mu bien, sobri tóu porque naquel momentu allegó Larry en compaña`l camareru`l bar, qu`apurría una desca de bebías.

Duranti un ratu, tóos ellos pimplemos ouzo de móu parcial, brindemos los unos polos otros y mos enterroguemos si tábamos casaos y cuántos jíos tiníemos.

Sigui...