Walden de Henri David Thoureau (1)

1. L`ensiñamientu de la simplicidá.

Juí a los boscos porque anjeaba vivir ena meditación, apetar únicamente los jechos sencialis, y no socediera qu`estando prósimu a morrer, aprendiese que no bía vivíu. No quisía vivir lo que no juera vida; ¡la vida es tan cara!, ne tampocu anjeaba praticar la resinación, a menos que juese talmenti atangüáa. Quisía vivir jondamenti y destriar tolo temporáu comu para jacer una engarra a tolo que no juese vida; jacer una cambáa ancha a ras del suelu; emburrar la vida a un esgonce y arreducila a los sus tréminos mas bajos, y si amostrase ser cubiciosa, otener la su lígrima y total astruñía y publicar la su roinera a petu`l mundu; u si, surtiera ser sublimi, conocela por desperencia, y ser pa dar una verdadera madurera d`ella ena mi prósima descursión. Porque me paez que los mas de los hombris están nuna destraña dulda atentu si sedrá del diañu u de dios la vida, y allegarin a la conclusión, un poco a jita, de qu`el colombru caberu del hombri sobri la tierra es "glorificar a Dios y gozar d`Él enternamenti".

Tovía vivimos miserablementi, comu jurmigas, onqui diga la fábula que jaz muchu juimos tresformáos n`hombris; comu pigmeos, aluchamos conas grullas; cai estrepe n`estrepe, remonta sobri remonta y la nuestra mijor virtú tién por ocasión una estuña sobranti y evitabli. Un hombri honráu no tién de nitar cuntar con mas que conos diez déos de las sus manos, y en casos destremos puéi añidir los diez déos de los pies y dejar pa práu lo demás.

¡Simplicidá, simplicidá, simplicidá! Sean los tus asuntos dos u tres y no un cientu u una milenta; ental d`un millón cunta meya docena, y haci la cuenta ena uña de la déa. Nel meyu d`esta mar garranchosa de la vida cevilizáa, son talas las nubis, los trubonis, los sables movedizos, y los mil y un esgonces que tienin de considerase, qu`un hombri, si no quier anagar y ajundise ensín allegar a dengún puertu, tién de vivir hiciendo contaeru, y tién de ser un gran calculaor, sobresabíu, el quien tenga ésitu.

Simplifica, simplifica. Ental d`un cientu platos, cincu; y mingua las otras cosas ena mesma proporción.

Sigui...