Entradas
La SITUACIÓN tornose interesanti cona allegáa de Leslie en compaña del quien paecía l`escarceáu carpinteru`l barcu. Tóos olvidarin entós las sus bebías y benifestarin las sus teorías al carpinteru, qu`amostrose repucháu a tóas ellas con airi sabiondu. Depués, comu un jechiceru, arremangose y averose a la puerta. Hézose un silenciu. Sacó un destornicaor del bolsu y metiolo por un joracu. Oyose un clic y un griju sordu d`almiración, y la puerta abriose`n parracil. Garreó y espurrió las manos al simen d`un prestidigitaor.
El primer hombrucu y Margo salierin comu sobrevivientis del Joracu Negru de Calcuta. El contaor de navíu garró al probe hombrucu y lu alumbró, caneó y esmengó, mientris lu ensultaba enforma. Entós intervino`l carpinteru, pos él abrió la puerta. Ascuchemos con respetu mientris declinaba l`ingeniosu mecanismu de los piesllos en general y d`aquel de particular. Echose pol pasapán un ouzo y pusiéndose poéticu parlando de piesllos, qu`eran singún paez el su ajechiscu. Era p`abrir cualisquier piesllu con un destornicaor u con una jorquilla u con una punta dombláa u enclusen con un peazu plásticu.
Cuegió del brazu al hombrucu y al contaor de navíu y metiolos al interior del sirviciu comu curdiros que van al mataeru. Enantis de que sedríemos pa galgalos, pieslló de súpitu la puerta. La mi familia, y las tres siñoronas asperarin calteniendo l`aliendu.
Oyerinse destraños resobones y golpucos, depués hebo un largu silenciu. Siguió una turrienti de juratos del contaor de navíu y del camareru, mestu con ralas desculpas y desplicacionis del despertu en piesllos. Cuandu marchemos jurtivamenti, las tres damas cuegían correndera pa emburrar nueamenti escontra la puerta.
Gerald Durrell
El viaji inaugural
No hay comentarios:
Publicar un comentario