Magasin Général

Dendi qu`aprendí esta banda deseñáa, estoi atopándome con momentos d`auténtica lambionáa visual. Régis Loisel ("Peter Pan" y "L`escarcéu del pájaru`l tiempu") y Jean-Louis Tripp danse la manu y debujan un cuadru temporal y coral nun pueblucu del Quebec. Ambos son debujantis, ambos dejarin los sus argullos ena cuneta pa trebajar juntos. Casu ralu.

El relate (pol momentu 3 tomos) espienza cona muerti de Félix, l`amu l`almacén del pueblu, el Magasin Général, verdaeru centru d`aición del conceju serrón de Notre-Dame-des-Lacs, lugar ondi ascar jarina, azúcara, puntas u jabón. Marie, la viuda, amúrriase desasperándose pola posibilidá d`apetase al trebaju, jartu, del almacén. Peru la vida apurrirá un miragru, ensín dir ajita: la genti d`esa comunidá quier que Marie siga, a pie jinquete, nel almacén. Son los años venti del siglu XX y las hestorias cutianas d`unos presonajis arreconociblis (el cura ensín vocación, un atéu rutón qu`está jaciendo un barcu, las jermanas santonas que tolo cretican, ect.) van a complicase, pocapocu.

A meyu caminu enti "Ana de Tejas Verdes" y "Dotor n`Alaska", de debuju caldu y jermosu, con gran sen d`humor y d`emoción.

Títulos libráos: "Marie", "Serge" y "Los hombris".