Los tres pelos d`oru (y 2)

Dientru bía una viejuca aseláa a la vera`l llar encesu. La vieja apurriólu a la calor, ateclólu y púsolu nel su somantu. Caltúvolu aneándolu al simen d`una madri col su bebé. Allá quedarin ellos, el probe vieju qu`era tóu pelleju y güesos y, la vieja tresnáa, aselanti y oldeanti. Allá quedarin mientres la vieja lu obaba dijendo: “Oba, oba, no pasa náa”.

Tola nuechi estuvo arrunándolu y, a la raita`l sol, el vieju amozó y abora era un mozu galán col pelu doráu y robráos miembros. Peru la vieja lu siguía aneando: “Oba, oba, no pasa náa”.

Al albiar, la vieja siguía obando y, aquel mozu convirtióse nun neñu de melena cuspía al trigu doráu.

Cuasi nel remanecer, la vieja arrancólu supitamenti tres pelos de la guapa melena del neñu y tirólos al suelu. Los pelos hicierin: “¡Tiiiiiiing!¡Tiiiiiiiing!¡Tiiiiiiiiing!”

Y el neñucu, que siguía nel somantu de la vieja, abajóse y jue arronti a la puerta, galaneando. Arrecatóse una alendáa y, trés sonriir a la vieja, najó la casa y esquiló al cielo pa ser el latagudu sol matinal.

Tradicional de Rusia

Los tres pelos d`oru (1)

Bía una vegáa, hebo una vegáa nuna lóndriga y jonda nuechi, una d`esas nuechis enas que la tierra es de color negra y los árbulis paecin unas ñudosas manos escontra`l trelumbranti cielu azul escuru, nuna nuechi cuspía a ésta un vieju trevesaba`l boscu con pasu tatencianti y en solidez. Onqui las quimas de los árbulis lu mancaban la cara y meyu lu cegaban, él caltenía por riba una lanterna. Dientru del candil, la vela encesa díbase finando pocapocu.

El vieju era tóu un despetáculu col su largu pelu amarillu, la su amarilla dentambre meyu pocha y, las sus uñas de color ámbar. Tinía la espalda tan cambáa comu una quilma de jarina y, era tan vieju que la piel escolgaba del garguelu, los brazos y las caeras.

El vieju alvanzaba al treviés del boscu, garrándose a un avillanu pa dase umpía, emburrando del cuerpu cancia lanti y asina dir garrando otru avillanu; con esta muvición cuasi de remu y col pocu aliendu que tinía, siguía pol su caminu alanti.

Tolos güesos del cuerpu alampábanlu cona dolor de la rumera. Las nuéticas de los árbulis sullaban arrentando`l ruíu de los sus gonces rumerosos cuandu andaba ena escuridá. Allá lantón candilitiaba una luzuca, una casuca, un juéu, un llar, un asubiu. Ensín aliendu allegó a la puerta, abrióla y la vela s`apagó. Él cayó al suelu de cansu que diba.

Sigui...

El soberáu

De cuandu en vez, egual qu`una vesita al soberáu, mos asganza l`arcordanza de los quienis ya no están con nos.

El cantíu Ar solier (El soberáu) es de Marthe Vasallo y Phillippe Ollivier. El retratu es de la mi güela, la mijor contaora de cuentos del mundu, conos mis tíos y ma mamm...

Ho hent `oa dirakoc`h da doullañ evel amañ bremañ dirakon
Ma hini din
Distumm ha gwerc`h

Memes doan ha memes kriadenn
Er momant-se `mez ar santimant e teuan da vezañ kar dit da vat
Mamm-gozh
Ma c`hoar
Ma merc`h

Trugarez braz da ar re holl mammoù-kozh... Gracias a asgaya a tolas güelas...

Pies jermosos

La mojer que tién los pies jermosos
enjamás podrá ser fea.
Duenda suel subile la beldá
por todillos, pantorras y mulsos,
uyar nel pubis
que siempri estuvo llendé de tóu canon,
arrodiar l`umbligu comu un d`esos pínfanos
que si los pretas tocan Para Elisa,
arreivindicar los lúbricos mamucis asperantis,
entreabrir los labios ensín pronunciar saliva
y dejase querer polos güejos espejo.
La mojer que tién los pies hermosos
sabi carrilar pola tristura

Mario Benedetti

Pies jermosos

Demetra y Baubo (y 3)

La bailaora, Baubo, era rialmenti un prodigiu pos de la su boca surdían hestorias y cuentos coloraos mui sorgosos. Demetra río y río, destañando nunas cascajáas que surdían del jondu del su ser. Ambas mojeris, la gran diosa de la fertilidá de la tierra y la pequeñuca diosa de la nación parlanti, rierin comu relochas.

Aquella risa arrescató a Demetra del su acolechamientu, del coloñu nel qu`estaba, dándole correa enforma pa siguir l`escarcéu de la su jía y, cona auda de Baubo y Hermes pescudarin a Helios, l`astru solar, y ésti díjoles óndi taba prisionera Perséfone. Zeus, cansu d`un mundu estiel, acemangó a Hades y obligólu a soltala. Ésti, alcedió peru cona condición de que no comiese náa ena güelta. Perséfone comió una granáa con seis granas.

Trés poner n`abertal a Perséfone, el mundu, la tierra y las naciones d`alimalis y mojeris golvierin a tener fertilidá, peru Perséfone tendría de dir a Los Profundos seis mesis al añu, unu por cáa pipa de granáa. Los mesis fríos.

Clarissa Pinkola Estés

Mojeris que cuerrin conos lobos

Edit. Zeta

Demetra y Baubo (2)

No hebo móu d`alcontrar a Perséfone y, en toa manera, Demetra espenzó l`escarcéu de la su quisía jía por dellos mesis. Taba descuajáa, pujitianti, berrona, pescudanti; diba a buscu por tolos esgonces de la tierra por riba, por baju, por dientru. Pidió morrer, por compasión, a trucu de la su jía. No jue p`alcontrala.

Ella, qu`era la diosa de las cojechas, de la nacencia de los frutos, dió un maldáu a tolas tierras del mundu, grijando con dolor dijo: "¡Morréi! ¡Morréi! ¡Morréi"

No hebo nacencia de dengún neñu, de denguna creatura, no brenó`l trigu, no hebo flores pa las fiestas ne quimas pa los muertos. Tóo quedó ataláu y ruvieju ena tierra estiel y enos pechos ensuchos.

Enclusen la mesma Demetra ya no se ribiaba, ya no se bañaba. Las sus túnicas taban ñacaráas de barru y el pelu paecía rozu. Ne cona cordial que sofría allegó a dase, y siguía escarceando a Perséfone. Pescudaba ensín cesía por pueblos y pagüenzos, enas islas y puertos. Depués de tantu aluche escontra`l distinu, Demetra diba nuna dea, al pintís del acolechamientu, contiáa namás que por un jilu d`asperanza; y ésti ibróse un día mientres bibía un suerbu d`augua nun pozu. Demetra vió l`arreflezu suyu nel augua y vió a una mojer aviejáa, entrequidenti y, cayó ensín aliendu pa siguir a buscu de Perséfone.

De súpitu, pareció una especie de mojer d`enti unos matos. Bailaba y cantaba esmengando las caeras comu si estuviera ringlando y, los sus pechos boyeaban al empar de la danza. Tinía una melena larga que surdía de los hombralis, caendo polos laos del su cuerpu chaparretu y sobri l`harpa que tocaba. Los güejos estaban enos mamucis de los pechos, la nariz nel umblígu y, la voz tatareanti surdía de la nación.

Al vela, Demetra no jue pa galgar la cascajáa.

Sigui...

Demetra y Baubo (1)

Demetra -u Deméter-, era la diosa de las cojechas, de la tierra (no del planeta) y de la fertilidá agrícola. Un día, ésta, diba cona su jía Perséfone por un práu y, de súpitu, la neña atopó una flor jermosísima. La neña puló la flor y, comu era tan guapa y de tala color esconocía, finó por cuertala. Súpitamenti l`astragu del suelu espenzó a dar sacudiatos y a abrise una resquiebra que diba nantando alredor de Perséfone. Del jondu de la tierra surdió Hades, el dios de Los Profundos. Era altu y jampudu y, manía nun carru negru con cuatru caballos de color pantasmal.

Hades garró a Perséfone y apurrióla al su carru nun michorcu de grijos, velos y sandalias. Depués, los caballos catroparin a Los Profundos de la tierra. Los grijos de Perséfone diban esmanándose enanque, pocapocu, la tierra piesllaba la resquiebra y l`astragu quedaba comu si náa socediese.

Los grijos y pujiteos de la moza retinglaban polas garmas, polas vargas, polas montañas, polos ríos; y a la final, remanijarin dendi`l jondu la mar. Demetra sintió grijar a las piedras. Sintió grijar a la tierra pindiu. Sintió grijar a las esquientas. Sintió grijar a los cudonis del ríu; y a la final, sintió grijar a los garranchos. Depués, un mostruosu silenciu coronó tola tierra.

Demetra arrancóse la corona de flores del su pelu enmortal y espurriendo los velos qu`atotogaban los sus hombralis, voló sobri la tierra al simen d`un ave giganti, escarceando y apeldando a la su jía.

Los seris que moran ena tierra, nel airi y ena mar, sintierin esi día tres grijos: el griju d`una moza aterrecía; otru, una apeldáa sofrienti y apeldanti; y el tercer, el pujitéu d`una madri.

Sigui...

Mojeris que cuerrin conos lobos

Clarissa Pinkola Estés

Esti es un cuentu libráu pola autora del libru, poínase enos diosis griegos, peru no es un relate de la mitología griegu qu`allegui a nos.

Esta tradución es libri y, premitíme añidir y quitar dellas cosas del testu original.

Baubo

Enti las culturas antiguas y clásicas desistió una clas de diosas que sedriemos pa declinar comu de la sexualidá, enclusen de la oscenidá (Ob, n`hebréu antigu, sinifica bruja, güícera). Son pocos los relates, peru hailos, y siempri, la diosa parla dendi`l su sexu. Baubo (Yambe, etc.) son diosas de la encle, del baju vientri, de la vurva... de la nación. No son diosas de la fertilidá.

Las arrepresentacionis de Baubo son d`una mojer que no tién capeza, los güejos son los mamuces, cona zona la jóndriga, las caeras, las jambas y, por cima, un peináu y una harpa (no siempri tién harpa). La su boca, por ondi parla, es la nación y, es tamién un meyu de prima materia, de simbolismu oscenu qu`auda a dejar, a najar la tristura y l`acolechu. Cuandu parecía Baubo, ésta, hiciendo un viecu oscenu, trucaba`l dolor por una alegría menos jormal.

Eisenhower visita a las sus tropas

El general estaonidensi Eisenhower tinía de visitar a las sus tropas en Ruanda y, pa dale carauter oficial, el gobernaor de la zona (hombri fatu y garantujeru) mandó a los jefes de las tribus qu`entarajilaran l`oldéu al general. La genti tindría de ponese nel caminu rial, saludar, alear y vitorear. L`únicu problema era que la genti de la zona diba talmenti esnugu, lo que pal gobernaor y pal melitar americanu era declinanti d`ausencia de moral y primitivismu.

Al rápalu, el gobernaor y los sus asistioris, consiguierin pantalonis pa los hombris y sayas pa las mojeris que dierin a los jefes de las tribus. Pa tóos ellos tinían unas jubonetas aspras que taparían l`arca. No juerin pa conseguir muda pa tanta genti, peru, a güeju de meya fanega la visita diba a paecer curiosa y moralmenti cristiana.

-No hai problema -dijerin a coru.

Encontóo, el día de la manífica pasáa, pocu enantis del pasu d`Eisenhower pol caminu rial nel su Jeep, aprendierin que dengunu tinía puesta la juboneta, de móu que las mojeris tinían los sus pechos al airi. Era una situación pocu hallaera pa los asistioris del gobernaor... y pa la genti que no taba amezáu a poner ropa.

Mandarin avisu al gobernaor y, ésti, ordenó que las mojeris taparan los sus pechos al pasu d`Eisenhower. Con pacencia y superioridá, los asistioris dijerin que tinían de tapase los pechos nel desfile.

-No hai problema -dijerin a coru.

Vae cara pondrían Eisenhower y el gobernaor alvanzando nel Jeep y viendo cómu las mojeris diban tapándose los pechos (y jasta la cara) cona parti alantera de la saya, dejando al airi las encles y lo demás...

Dijíu cántabru:

Al deslayu, al deslayu, pon ena capeza`l sayu