La creación del cielu

Singún los aborígenis del centru d`Australia, la creación del cielu jué asina:

Nun principiu, no bía ne sol ne luna ne estrellas; y el cielu taba ensemble cona tierra. Tolos seris de la tierra sofrían sol pesu del cielu, puntu pior las cotorras, que no eran pa espurrir las sus alas y viíanse ubligáas a basquear nel astragu de la tierra, al simen d`enánagos.

Un día, hicierin conceju y comparciarin emburrar ensemble el techu que les pretaba, erciéndolo por riba la tierra. Cáa una d`ellas apañó un palancu, y a una siñal, encetarin a emburrar. Nuna primer alendáa no socedió náa, peru luegu, de súpitu, oyóse un trisquíu y un gran pujitéu. Las cotorras pretarin mas, y una resquieza de luz pareció nel horizonti. Esa trelumbri era de gran beldá.

Siguierin esmenganando, y sintierin que las sus patas despegábanse del suelu, y l`airi enti la tierra y el cielu comblose de borraos del su aletéu. "¡Muévese!", grijarin las cotorras, y pocapocu el cielu era mas ligeru y mas cincíu d`isar. Apararin a alendar un ratu, poinándolo enas esquientas y los cumbris de las montañas de mas altor, y golvierin a emburrar.

De súpitu, el cielu rajose de pintís a pintís, y la luz, una luz nuéu que las cotorras no conocían, anagó`l mundu, descastando las sembras: surdió`l sol latagudu, l`airi, los árbulis obándose, mares descorrutos y, por riba, el tombu del cielu, flotando nel sinfinitu, convertíu n`otru mundu pa la diosa del sol, el dios de la luna y tolos seris-estrellas que nél alcontrarin asubiu.

Las cotorras enjamás han olvidáu esi aliendu de felicidá, en tóa manera que, cáa remanecer oldean l`albiar y las trelumbris col mesmu conciertu de cantíos, trineando comu hiciérinlo aquel primer día.

Dendi entós, el tombu celeste suel ser l`ultimu asubiu de tóa clas de creaturas qu`escancean beldá, paz y seguranza.