Allanando coteros

Los dumingos pola tardi, l`hombri blancu manía aburríu, y decidió apurrir un lapín a Australia, pa destraese cona caza. Por entós, ya tinía un perru qu`avilaba la casa, un gatu qu`asechaba a las benadijas, un caballu col que catropar pol país, una güeja que daba lana y carni, una vaca que daba lechi, carni y burdíu; y un chon y pitas pa comer güevos con torrendos; peru comu`l trebaju de cuertar el boscu y alampar los escajalis era jartu duru, decidió adeicar el dumingu al dios muertu nuna cruz, y a la caza del lapín…

El cudar toalle del hombri blancu surtió diendo al garifu –l`hombri blancu es sercinu y tasugu comu pocos- y, pocapocu, los lapines eran un bálamu, y depués, un michorcu, un problema. L`hombri blancu cudó que sedría güenu apurrir un raposu pa cazar tantu lapín, pos comían las herbas qu`eran pación de las vacas y güejas. El raposu aprendió qu`era mas cincíu cazar marsupialis que lapines, y púsose a ellu. Los lapines, a lo suyu...

Allegó un momentu, nel que las vacas, güejas, caballos y lapines eran por demás pa una tierra tan probe, en tóa manera que, la tierra quedaba esnugu y estiel. Ya no bían árbulis ne matojos, herbas ne augua, peru sí bía un vientu qu`hicía alvanzar el desiertu y una punta marea d`alimalis ajambraos espurriéndose por tol país.

L`hombri blancu cudó que sedría güenu apurrir burros y camellos al desiertu, y cudó que sedría güena idea. Tamién apurrió, estornillos, ranas, ratas, rapas –pa controlar estornillos y ratas-, chivas y cámbaros. Lazos, que trés un tiempu d`aclimentación, son pizotías perigrosas pal socoliñe cológicu del jardín del hombri blancu.

Nesta engarra escontra la natura, los alimalis sellencos d`Australia rabean a tentujones, abacoraos y ensín ser pa najar, enclusen dellos lazos quedarin descastaos. Enanque, los alimalis jolasteros vivían n`abertal, medraban y nantaban por milentas, por millones. Entós, l`hombri blancu cudó que sedría güenu descastar las plagas del su jardín, y pa ellu cudó que sedría güenu jacer un andanciu con malencias comu la mixomatosis. L`hombri blancu tién la zuna de cudar, y cudar que cuda bien. Terne que terne, onqui paeza una recontravición, l`hombri blancu güelvi y da palos a tentujones. Enanque, el su jardín –era suyu porque lo tomó- estaba jechu un coloñu, peru tovía bía tresechu pa siguir… y siguió.

Los andancios qu`ensimentó enti los alimalis jolasteros mataban a rapaterrón. Milentas d`alimalis morrían cáa día. Un drama. Peru, terne que terne, la natura siempri degüelvi un bojetón al hombri blancu y, los alimalis jolasteros, depués de ser dicimaos, golvierin a nantar, abora, con mogura a las dulencias. ¡Váe sercinu!

L`hombri blancu no deprendi de los estrepes ajenos –sellencos-, y entós, n`Europa, un sabiu cudó que si “endicionaba” la mixomatosis a los lapines qu`atacaban el su jardín, éstos morrerían y finaba`l "su" michorcu. Hézolo y, por tóa Europa espiblóse la mixomatosis, descastando al lapín européu; raposos, gatos algares, lincis, etc, juerin detar. Otra lición del güen jacer del hombri blancu, que no tién problema en lialas, esté ondi esté.

Y colorín colorete, pola chimenea salió un cohete; y colorín coloráu, tenemos el jargón cagáu.