El vuelu del colibrín

Esta es la hestoria del gran boscu que s`alampó. Las despiadáas llapas rutaban y atalaban. Los alimalis no usarin y ajuyerin de las sus joracas. L`elefante y el tigre, el castor y l`osu, tóos ellos pescarin a correr, enanque, sobri las sus capezas, volaban aterrecíos los pájaros. Ajunárinse nel pintís del boscu y oservarin el desastri. Acurriárinse tolas criaturas, menos una. Dukdukdiya, el colibrín, jue l`únicu que repuchóse a najar el boscu.

Dukdukdiya voló a escapi jasta la rullega y apañó una gotuca d`augua col picu. Dukdukdiya tornó al boscu encesu y espibló la gota d`augua enas llapas. Voló otra vegáa a la rullega y apañó otra gota, y asina siguió, diendo y viniendo, diendo y viniendo col augua.

Los demás alimalis oservaban el chicucu cuerpu de Dukdukdiya, que volaba pesi al giganti juéu, y sofrían. Apeldaban grijando al colibrín p`alvertile de los perígros del jumu y la calor.

-¿Qué voi a jacer yo? -pujiteó la liebre-. El juéu es ulsanti.

-¡Y hai mucha jumu! -agulló`l lobu.

-¡M`alamparé las alas! ¡Y tengo`l picu mui chicu! -grijó`l búu.

Peru l`humildi colibrín siguió col su labarientu. Volaba a la rullega, apañaba una gota d`augua y echábala nel boscu encesu col su picucu, y entós, golvía a espenzar otra vegáa.

A la final, el gran osu pescudólu:

-Dukdukdiya, ¿qué jacis?

Ensín aparase, Dukdukdiya abajó la capeza cancia los demás alimalis que lu oservaban y dijo:

-Jago lo que soi pa.

Michael Nicoll Yahgulanaas

El vuelu del colibrín

Edit. Oceanu 2008