De cómu nació la moroya del Boscu (1)

Bía una vegáa, hebo una vegáa un serrón que vivía nel boscu. El serrón sintíalo comu suyu porque jugó n`él, amó n`él, y las sus quimas asubiárinlu de la chuvia y la calor.

El serrón era jíu y nietu de serronis y d`ellos deprendió qu`un hombri sólu es pa jacer descastar un boscu. En toa manera, cuandu allegó`l momentu, egual que los sus mayoris, ensimentó un árbul y, al domblar ésti la su altor, dejó l`oficiu.

N`alcordanza de lo que bía síu, cuertó un árbul, serró la maera y costruyó una cincía mesa. La mesa y él aviejarin en compaña. Sobri ella comía`l serrón, riía, echaba la partida, echaba una parláa col su jíu y echaba una cantáa conos amigos. Dendi la su mesa contemplaba`l boscu y, sobri ella morrió.

El jíu del serrón sintía tanta tristura cuandu miraba la mesa que se la dió al panaleru. Ésti, agraecíu, dióle tres prestosos panis.

Duranti años el panaleru mansó la jarina y puso los arrescendientis panis ajornaos ena mesa, jasta que los sus brazos no juerin pa trebajar mas.

Jue entós cuandu la vieja mesa pasó al lecheru que, agraecíu dióle nata prestosu pa jacer tres güenos pastelis. El lecheru pusía las perolas combláas de lechi recién cilláu ena mesa pa qu`el gatu no lo asganzase. Peru una vaca cuegió la zuna d`escarramanalo col rabu.

Sigui...