A buscu del licorniu

Con esti títulu naz en 1997 una banda deseñáa de la debujanti Ana Miralles y el guionista Emilio Ruiz, la hestoria está poináa nel libru original de Juan Eslava Galán (Edit. Planeta).

A últimos del siglu XV, una despedición castillana marcha a África a buscu d`una cuerna de licorniu, materia basal pa jacer un bálsamu escontra la empotencia del rei Enrique IV "l`empotenti". Sedrá Juan d`Olid el capitán del viaje y, p`allegar al su distinu cuntará con 40 ballesteros, un mayordomu, un fraili, un mélicu, tradutoris y una virgin con tres asistioras. Supíu era, d`aquella, que los licornios dábanse a las vírgenis, alendáa esta, ena qu`eran pa se cazar.

Los tres tomos d`esta epopeya (La mancaura y el bálsamu, Los jerreros blancos y Finis africae) jacin un relate croel y cermeñu d`un viaje escripíu de talangueras, traicionis y trampas. La compaña trevesará Marruecos, el desiertu y, s`enjarbará ena selva centrafricana, peru la duranza de la despedición sedrá de 20 años. Pol caminu atoparán, a tentujones, el finu jilu que los guiará cancia`l alicorniu (rinoceronte), dejando la vida nel escarcear un remeyu pa la empotencia rial. El comerciu d`esclavos, las guerras, los motines y los caminos desintoriaos y escabildraos; las fieras humanas y alimalis completan un relate ondi, tamién, hai un pizcatu d`erotismu (Ana Miralles mos tién amezaos n`otras bandas deseñáas: Eva Medusa). A la final, Juan d`Olid sedrá l`únicu que sedrá pa tornar dendi la costa del Índicu, presu nun barcu portugués. Cuandu allega a Castilla, el rei va 18 años muertu y, la su aventura ulvidáa. Anajó Sevilla nel añu 1471 y allegó 20 años depués, con una promesa ensín cumplir y otra por complir.

El debuju d`Ana Miralles es limpiu y rialista. L`equipu jormáu con Emilio Ruiz pareció tamién en El brillu de la miráa. Libráu pola editorial Glénat.