Tóo s`esborrega (2)

Y entós un vieju dijo que tinía una dulda.

-¿Qué dios es esi de vos? -pescudó- . ¿La diosa de la tierra, el dios del cielu, Amadiora de la llampa u cuál?

L`intérprete parló col hombri blancu y ésti arretrucó derréu.

-Tolos diosis que mentesti no son diosis. Son falsos diosis que vos mandan matar a los vuestros amejantis y asesinar a neños enocentis. Sólu hai un dios verdaeru y Él tién la tierra, el cielu, a ti y a mí y, a tóos nos.

-Si dejamos a los nuestros diosis y siguimos al vuestru -pescudó entós otru hombri-, ¿quin mos asubiará del embutiju de los nuestros antepasaos y de los nuestros diosis derdejaos?

-Los vuestros diosis no están vivos y no son pa jacevos lijaura denguna -arretrucó`l blancu-. Son peazos de maera y de piedra.

Los hombris de Mbanta estañarin nuna cascajáa despetiva cuandu l`intérprete tradujo esu. Estos hombris tienin d`estar relochos, mermuraban. ¿Cómu eran pa dicir sino qu`Ani u Amadiora eran enofensivos? ¿Y Idemili y Ogwugwu tamién? Asina que dellos espenzarin a marchar.

Entós los misioneros echarin un cantáa. Era un d`esos cantíos melodiosos y alegris del evangeliu que tuvo la virtú de polar silenciosas y povareras jebras del cordial de los ibos. L`intérprete desplicaba cáa versu y dellos quedarin soyugaos. Era una hestoria d`unos jermanos que vivían anagaos ena escuridá y nel miéu, enorantis del amor de Dios. Parlaba d`una güeja qu`estaba enas brañas, lejonas de la portaláa de Dios y de los amoraos cuidos del pastor.

Sigui...