El país de las maravillas (2)

El siñor Tompkins despertó col destrañu sen d`estar acostáu sobri angu duru. Abrió los güejos y la su primer impresión jue qu`estaba echáu sobri una gran llastra a la vera la mar. No uyó n`aprender qu`era ciertamenti una llastra, d`unos nuevi metros de diámetru, peru escolgáa nel espaciu ensín poinu visibli dengunu. A tresetros medraba mogu y polas resquiezas asomaban unos pocos matos. Alredor, l`espaciu estaba trelumbráu por una luz encierta y bía mucha polvu por toas partis; nunca vió tanta, ne siquiera enas pelícolas qu`arrepresentaban trubonis de sable nel desiertu. Añudóse`l pañuelu por lanti la nariz y sintió gran aliviu. Peru no jaltaban al su alredor cosas con mas pirigru qu`el polvu. A cáa alendáa apasaban juntanu a la su llastra piedras tan grandis u mas qu`una capeza; daque d`ellas d`estañaban con un ruíu destrañu y sordu. Alvirtió tamién un par de llastras al simen de la suya, que flotaban nel espaciu a cierta distancia. Enanque`l siñor Tompkins aprendía los alredoris, garrábase desasperamenti a las ralas ariestas de la piedrona, no usando d`estorregase a las torcas polvoreras que viía en baju. Luegu s`envalentó y decidó eslozase jasta`l ren de la llastra, pa ver si no tinía náa que la poinase. Diendo a rastras, alvirtió con gran sorpresa que no bía pirigru de caer, porque`l su mesmu pesu lu aldería escontra l`astragu de la llastra, pesi a que ya arrecorrió mas d`un cuadranti de la su cirunferencia. Asomóse por detar d`un mormazu nel otru pintís d`aondi despertó, peru no aprendió náa que poinara la llastra nel espaciu. Distinguió con asombru, encontóo, la escafa d`un hombri altu, de larga barba blanca, que manía de pié peru buz abaju (esu paecía) y notaba cosas nuna libreta. Arreconoció al profesor a cuyu espiche jue aquella tardi.

El siñor Tompkins espenzó a comprender. Alcanzóse de qu`ena escuela deprendió que la Tierra es una gran mole esférica que torna n`abertal alredor del sol, al treviés del espaciu. Alcanzóse tamién d`un debuju nel que s`arrepresentaba un par d`antípodas, en puntos diametralmenti escontrarios del planeta. Ensín dulda, esta llastra era una gurrufalla celeste que tolo atraía cancia`l su astragu y cuntaba con él y el vieju profesor por toa población. Estos cudares lu aselarin un pocu. ¡Polo menos no bía pirigru d`estorregase!

-¡Güenos días! -dijo`l siñor Tompkins, pa apeldar l`atención del vieju, clisáu enos sus cálculos. El profesor arzó la miráa del su libru de notas.

Sigui...