El dejuntu Matias Pascual

(...)

Aquel probe hombri sólu cudaba enos diez céntimos que costaba`l viaje, y no aparaba de dicir que chin a chin de diez céntimos escuyábase comu augua tol su roín sueldu, surtiendo no ser enforma pa jacer aquella vida triscona con tranvía létricu, luz létrica, ecétera, ecétera.

Y, encontóo, cavilaba yo: la cencia s`atribui la lienda de jacer mas fácil y hallaera la vida; peru entá supusiendo que verdaeramenti la jaga mas cincía conas sus máquinas tan complicáas, entrugo yo: ¿Y qué sirviciu más roín puéi jacele al quien está condenáu a una labor vana que jacésela fácil y pocu menos que mecánica? Golvíame a la jonda.

Allí, nel carreju, escolgáa juntana a la ventana, bía una jaula con un canariu. No siendo pa parlar cona genti y no supiendo qué jacer, pusíame a parlar col canariu; arrientábale cona mi voz, y el probe pajarucu criía que le dicían angu, y aparaba a ascuchar, y quizaes n`aquellos píos míos camientase airis de viesca, de libertá... Regolvíase ena jaula, blincaba d`una caña a otra, miraba al deslái meneando la pezuca, y depués m`arretrucaba, m`entrugaba y manía ascuchando. ¡Probe pajarucu! ¡Cómu m`entendía él, mientres que yo quedaba en peristas de lo que biera dichu!...

Onqui bien miráu, ¿no mos acontez a los hombris angu atraíu? ¿No mos creemos tamién nos que la Natura mos parla? ¿Y no mos paez ascuchar un sen enas sus vocis misteriosas, una retruca, singún los nuestros deseos, a las anjeantis pisculizas que le jacemos? Y lo mas pusibli es que la Natura, ena su manitú sinfinita, no tenga ne la mas remota idea de nos y del nuestru vanu aléu.

¡Peru hai que ver a qué conclusionis le conduz una groma surdía del jolgar a un hombri condenáu a estar siempri en sólidu! Pujos me daban de liame a palos cunmigu. ¿Estaría yo de veras en vísparas de cunvirtime seriamenti nun filósofu?

No, no, ¡quita! No era lógica esa condución. De suerti que no bría síu pa siguir oservandola mucha tiempu. Era precisu que yo venciesi toa curtedá y adotase comu sea una resolución.

Nuna parabra: yo tinía de vivir. ¡Vivir!

Luigi Pirandello

El dejuntu Matías Pascual