El cantíu de la máiz (2)

Los pujiteos que sentí de los agricultoris que vivían juntanu a la casa ondi moraba, hiciérinme cudar que tola máiz sofriría de sede. ¡Peru esi maizal paecía recién bindicíu pola chuvia!

Trespuse seglementi pol sedu arriba cancia`l pueblu, ensín veme`l vieju. El mi anfitrión taba despiertu y entrugóme óndi estuvi. Cuandu despliquélu lo que ví y sentí, l`interés qu`amostraba pol aquel de las mis cambalúas tornóse nuna sonrisa divertía.

-Veo qu`atopeste`l panizal de Titus-, dijo con una risuca aguantáa.

-¿Peru, por qué esi panizal está tan tresnáu? ¿Tién una juenti d`augua secretu?

El Gran Padri rió a gustu.

-Caru que no. Peru tién Navoti.

-¿Qué es esu?- Entrugué cudando que bría un burdíu esconocíu y alcesibli namás qu`a dellos clanis.

-Él tién el Sedu Hopi-, desplicóme`l Gran Padri, depués d`una alendáa cavilanti. -Él conoz los viejos cantíos qu`arrefrescan los sus mijotes. Diz los sus rezos correutamenti ena siembra. Y, lo qu`es mas importanti de tóo, sabi que no nita preocupase, porque l`angustia prejudica a las plantas tantu comu la seca. Ental d`angustiase, lo que pegaría l`angustia a los panizos, va cancia ellos ena calor del día y cántalos viejos cantíos que son, pa los sus jíos, juenti de valor.

-Peru Gran Padri, seguru que los otros hombris sedrán pa dase cuenta de la diferiencia de la su máiz. ¿Por qué no deprendin los sus cantíos y los cantan a la su máiz?

El mi vieju maestru hopi sospiró.

-Esu no val a naide. Navoti no vivi enas granas de los demás.

Sigui...