El juiciu (2)

A un viecu del juez, una pisondera qu`estaba mu seria escribiendo tol declinar de la nuética, averóse al corvatu amostrando lo escritu.

-¿Tién la siñora fiscal mas pisculizas?- Dijo`l juez.

-No, siñoría, no hai mas.

-L`albogáu, ¿tién pisculizas pa la testiga?- siguió`l juez, esta vegáa arrecatándose cancia la ronzuella, l`albogáa d`oficiu qu`estaba mirando a la ventana.

-¿Perdón?- Duldó la ronzuella.

El juez miró al techu y trés un sospiru golvió a pescudar: "Siñora albogáa, ¿quier entrugar a la testiga?"

-No, siñoría, no tengo entrugas.

-Entós, puéi anajar la sala, siñora nuética- Benifestó solene`l juez.

La nuética abajó de la trauna y cuandu diba pol meyu del estrechu carreju, anti la visual de tolos presentis, espenzó a jacer asparavanes y viecos comu d`ajuegase, basqueando al empar que surdía un anjéu del garguelu. Un silenciu anagó la sala y, justu cuandu s`acurrialgaba ensín airi, la nuética gomitó una egagrópila que cayó ruando a los pies d`un palombu culipavu, que con viecu de duda la esquivó. La nuética, ya toa compuesta, anajó la sala bujaleando.

La fiscal, que jasta entós parlaba cona su asistiora, la pigaza, dijo: "Cona venia, apeldamos a la siñora Colorín a tistificar".

Sigui...