Destrío esti testu d`una entrevista a Satish Kumar.
¿Por óndi espenzamos?
-Atanguamos desenrollar la colomía rial, la que poínase enas cosas que semos pa jacer conas manos, pintu`l casu l`agricultura, qu`es el setor mas importante. Aguañu, nel estáu español egual qu`el restu d`Europa, el 95% de la genti vivi ensín cultivar tierra, peru pa tener una rede colómica establi y caltenible atanguamos mas genti trebajando ena agricultura, produjendo alimentos de calidá y aleando las colomías locales. La globalización está prevocando`l calentamientu global del planeta, y amás que mas, colomías jelonas, enestablis y dependientes. La solución vién por tornar a lo local, a la colomía d`escala chica y galgar asina esi calentamientu global y globalizáu. El comerciu tresnacional tindría de ser sólu una parti mínima de la tarta. Si queremos enderechar esta cris hui, atanguamos crear colomías localis juertis y establis. Genti asgaya nita jacer cosas conas sus manos, golver a ser artesanos nueamenti. Enrobrar la colomías localis, l`agricultura y el trebaju jechu a manu, esa es la cambera.
¿Sedrá empusibli apetar esti debati pulíticu y social ensín arreverenciar a la natura?
-Caru. La cología es una disciplina espiritual, pos la conocencia deja de ser tala cuandu no sienti pasión pol ojetu. Si tú quiés deprender filosofía, no tratarás de meter ena moroya conceutos inteletualis, tiés d`amar la filosofía. Si quiés deprender arquitetura, no val con tener conocencias ténicas, tiés d`amar l`arquitetura. La conocencia de la cología sinifica amar la natura, sintir pasión y arreverencia por ella. Por esu insisto ena custión de qu`es una disciplina y una prática espiritual. Cuandu estoi ena natura, siéntome`n casa. (...)
¿Estamos mas averáos a esta visual abora que cuandu usté s`atopó con Gandhi?
-Sí- Aguañu estamos más averáos porque cuandu Gandhi parlaba d`estas cosas, la población mundial era la metá d`abora. La genti diose cuenta de que si no vivimos n`harmonía cona natura no sedremos pa sobrevivir. Pintu`l casu, si tol planeta consumiera tanta carni cumu ena dieta europea u nortamericana, atanguaríemos seis planetas pa producilo. Cuandu Gandhi parlaba, el procesu d`industrialización espenzaba con juerza y el su espiche s`atopó con un gran repuchamientu. Peru abora alleguemos al pintís, tenemos de cijar, de rabear y espenzar a cudar nel planeta. Criíemos que los nuestros recursos eran sinfinitos, peru abora la cris está enrobrando y tenemos d`apetamos al calentamientu global. Estamos en mijor posición p`aluchar con un retruque soldu pola proteición de la natura y las presonas. La humanidá tién hui esta gran jaba a petu; la oportunidá d`ercer una muvición muchu mayor y mas juerti que l`alendáa por Gandhi.
Entradas
