Los frisuelos de Mama Panya (y 3)

-Veni, Adika, no te desapartis de mí. Mos queda namás que p`ascar un pimientu picanti.

-Yo, mama, yo destriaré unu bien guapu.

-¡No, Adika! -desclamó la su madri, peru Adika ya diba pol puestu d`especies de Rafiki Kaya. Mama Panya allegó lo justu pa sentir:

-Esta nuechi la mi mama jadrá frisuelos. ¿Vindrás?

-¡M`encantaría! -retrucó Kaya, y cuegió la moneda de la manu de Mama Panya y trucóla pol pimientu mas tresnáu de tóos ellos-. ¡Es justu lo que val! Gracias por convidame.

Mama Panya sospiró.

Marcharin a casa.

¿A cuánta genti convidesti a comer frisuelos esta nuechi?

Adika, que comu siempri diba por lanti, retrucó contentu:

-A tolos nuestros amigos, mama.

Mama Panya puso un coloñu de quimas y maeras ena joraca del juéu. Adika jue a buscu d`un calderu d`augua. La madri trizó`l pimientu picanti ena tartera enanque Adika echaba un pocu d`augua n`ella. Añidierin tola jarina, regolvierin bien y vierin que no sobraría náa. Mama Panya echó un pociyucu ena sartén calienti de la lumbri.

Sawandi y Naiman allegarin los primeros y dijerin "¡Hodi!".

Adika retrucó "Karibu" pa oldealos. Los neños apurrían dos calabazas con lechi y un pocu de manteca metíu nuna cuerna de vaca.

-Mama Panya, esto mos sobró de cillar las vacas.

Mzee Odolo no uyó n`allegar.

-Hui el vieju Zambezi mos dió tres pejes.

Depués allegó Gamila con un recimu de plátanos ena capeza:

-Mecin bien conos frisuelos.

Bibi y Bwana Zawenna trijerin otra bolsa de jarina y dierinselo a Adika:

-Guárdalo pa otra ocasión.

Rafiki Kaya allegó con una mozáa de sal y cardamomos, y cona su mbira escolgando.

Y la fiesta espenzó con tol mundu asentáu sol baobab y col sinciu de comese los frisuelos que jezo Mama Panya.

Depués, Kaya tocó la mbira y Mzee Odolo cantó, onqui esgrijaba un pocu.

Adika sospiró, conos güejos brillantis y una sonrisa ena cara:

-Sé que diquiá pocu golverás a jacer frisuelos, mama.

Mama Panya sonrió:

-Sí, Adika, unos pocos y daque mas

Mary y Rich Chamberlin/Julia Cairns

Intermón Oxfam 2005