28 ago 2009

L`inombri de la rosa

El monesteriu ulsóse por tres días y tres nuechis, y de náa valierin los últimos esjuerzos. Ya ena mañana del siétimu día de la nuestra estancia n`aquel sitiu, cuandu los sobrevivientis diérinse cuenta de que no sedrían pa salvar dengún edificiu, cuandu s`estorregarin las parés internas de las costrucionis mas guapas, y la ilesia, comu atotogándose a si mesma, mangulló la su torre, n`aquel momentu flojeó en tol mundu l`aler d`alucha escontra`l castigu divinu. Arralárinse las carreras a buscu de los pocos calderos d`augua que quedaban, enanque siguía alampándose con ritmu pulseáu la sala capitular amás de los descelentis cuartos del Abade. Cuandu`l juéu allegó al jondu de los talleris, ya hicía muchu que los criáos bían pasáu tratando de salvar los mas posiblis de los haberíos, y agora escarceaban pola cotera p`acurriar polo menos a una parti de los alimalis, que nel labarientu de la nuechi ajuyerin de las cortes.

Vi que daque sobrevivientis usaban d`entrar eno que quedaba de la ilesia: camienté qu`intentaban entar ena cripta`l tresoru pa consiguir daque ojetu preciosu enantis d`escapar. No sé si juerin pa logralo, si la cripta no s`ajundió, si los lladres no s`ajundierin enas resquiezas de la tierra intentando allegar jasta ella.

Enanque, vinían hombris del pueblu, que subierin p`audar, u pa tratar d`apañar tamién ellos daque botín. Los mas de los muertos quedarin enti los casaris entá albos. Al tercer día, curiáos los mancaos, enterraos los caláveres que quedarin juera de los edificios, los monjis y los demás poblaoris del monesteriu apañarin los sus haberíos y marcharin del llan, qu`entá ajumaba, al simen d`un lugar maldáu. No sé cancia óndi ajuyerin.


L`inombri de la rosa
Umberto Eco

No hay comentarios: