La Paparrasolla, un ser mitológicu nel ulvidu.

D`aquella, allegaban a las nuestras costas y sables, unos güevos de piedra grandis. Éstos, flotaban ena mar y cuandu atopaban tierra ensuchu, s`abrían y surdía una creatura con visuales pocu humanos. Es la Paparrasolla. Tién alas, y cuandu medra, es pa volar –egual que las nuéticas, vuela de nuechi- No tién corras, sino que tién escarbaeras al simen del vilanu, del águilu negru u de la tajorna. El cuerpu está atotogáu por plumas –mas brancas nel petu y escuras ena espalda- y la su cara es humana, triangular y angulosa. No tién pelu, sino plumas. Los sus güejos son rojos y grandis. La boca tién dentanbre cabruñáa –comu las gamellas de los pejes- y es pa grijar tan agudu que lija los uíos. La paparrasolla no tién orejas, los sus oíos áinas puéin vese.
Cuandu naz, escarcéa asubiu enas sotarrañas y covarachas de la costa, peru de mayor vuela tierra adrentu y mane enas resquiezas del suelu, enos pozos y torcas. Allí jaz la su vida, usando de salir pa cacear –comi de tóu, peru lo que mas le presta son los pejes- y pa cubrise con otra paparrasolla d`otru seisu. La jembra pon un güevu que deja caer a la mar.
La paparrasolla no es un ser alrevesáu ne tién querencia por coronar a la genti, peru la su visual –y especialmenti`l su griju- es enrelocheceor.
Hai genti que tién la zuna d`acorar a los/as guajes/as acemandándolos cona paparrasolla. Genti malu hai en toás partis…