La guerra de la final del mundu

Leí esti libru con 12-13 años. No es güena edá pa leelo. Uyé un añu enterizu. La crudura y el trájicu endevinir d`aquella genti brasileñu, t`emburra y esmenga. A día d`hui, alcánzome de dellos momentos del relate con nítia claridá. Destrío esti testu del libru.

Cuandu, seimanas depués, súpose`n Salvador que nun pagüenzu lueñu llamáu Natuba los edictos de la flamanti República atentu los nuéos impuestos juerin alampáos, la Gobernación decidió mandar una juerza de Guarda Bahiana a prender a los rebecos. Trenta guardas, unijormáos d`azul y verdi, con quepis enos que la República tovía no bía cambeáu los escudos monárquicos, encetarin, primeru nel ferrocarril y depués a pie, el labarientu tresechu cancia esi lugar que, pa tóos ellos, era un llamatu nel mapa. El Consejeru no estaba`n Natuba. Los jidrántis policías entrugarin a concejalis y vicinos enantis d`anajar a buscu d`esi sediciosu cuyu inombri, llamatu y lienda apurrían jasta`l litoral y desparderían polas callis de Bahía. Guiáos por un guía de la región, azul verdosos ena solejera mañana, s`escabildrarin trés los montis del caminu de Cumbe.

Otra seimana estuvierin d`altibajes por una tierra roju, sabliza, con caatingas d`espinosos mandacarús y ajambráas recillas de güejas qu`ahucaban ena tarna, trés las esclaves del Consejeru. Tóos viérinlu apasar, el dumingu rezó ena ilesia, pedricando naquella praza, durmió juntanu a unas garmas. Atopárinlu a la final a sieti leguas de Tucano, nun pobláu de chozos de tierrardíu y tejas que llamábase Masseté, enas vargas de la Sierra d`Ovó. Era l`acaecer, vierin mojeris con ollas ena capeza, sospirarin al saber que finaba la prisicución. El Consejeru hicía nuechi ondi Severino Vianna, un moraor que tuvía un panizal a una milenta de metros del pueblu. Los policías catroparin canciallá, enti joazeiros de quimas jiludas y matas de velame que lijábalos la piel. Cuandu allegarin, meyu a escuras, vierin una vivienda d`estacas y un ensambri de seris enjormis, acurriáos alredor del quien tinía de ser l`escarceáu. Naidi ajuyó, naidi echó un griju al ver los sus unijormis, los sus fusilis.

¿Eran un cientu, cientu cincuenta, dorcientos? Bía tantos hombris comu mojeris enti ellos y los mas vinían, pol ropal que vistían, d`enti los mas probis de los probis. Tóos amostraban -asina lo cuntarían a las sus mojeris, a las sus quisías, a las sus piculinas, a los sus collazos, los guardas que tornarin a Bahía- unas miráas d`enebrabli decisión. Peru, en rialidá, no tuvierin tiempu d`oservalos ne de destriar al cabecilla, pos áinas el sargentu jefe lis ordenó entregar al quien dicían Consejeru, el gurgulazón echose encima, nuna aición de nítia usaura, cudando que los policías tinían fusilis y ellos sólu palos, jocetas, piedras, cuchíos y daque cuspeta. Peru tóu aconteció de móu tan súpitu que los policías viérinse arrodeáos, despardíos, acosáos, lijáos y mancáos, a la empar que sintíanse llamáos ¡Republicanos! comu si la parabra juera un ensultu.

Juerin pa disparar los sus fusilis, peru onqui cuandu caían baldragosos col petu abiertu u la cara desquijáa, náa los desaleó y, de súpitu, los policías bahianos vierense ajuyendo, atunicáos pola encomprensibli derrota.

Mario Vargas Llosa

La guerra de la final del mundu