18 oct 2008

Las torres de Bois-Maury

Con esti títulu enceta una colición de banda deseñáa d`ámbetu hestóricu, libráa por Hermann –debujaor belga- y que tién comu protagonista al caballeru ensín tierra Aymar de Bois-Maury y el su escuderu Olivier. Al treviés de 10 númberos l`ahechu caballeru de Bois-Maury viaja pola Europa altomeyeval escarceando posiblis pa entarmar una tropa qu`aude a contiar un ataqui pa tornar al su castillu (el castillu de Bois-Maury), aguañu sol yugu d`un usurpaor qu`asesinó a la su familia cuandu era guaje, arrefañando las sus tierras y domiños.
El debuju de Hermann es duru y acorde; y es pa jacer cualisquier fegura humana dendi cualisquier postura. Los sus paisajis son maníficos, ena natura y ena ciudá. La color es sobria y rala, egual que los diálogos, que son latagudos y mos jacin fatear que l`autor midi munchu lo qu`escribi. Quiziás, una las carauterísticas mas suliñablis de Hermann sea la su capacidá pa debujar silencios qu`enjamás descuajan.
Diferienti a otros debujaoris de banda deseñáa, Hermann apresenta un mundu rial, de feos, de jaques, d`otomías y siniquidáes, de jarcias y vidas d`honra y probura.
Trés dellas aventuras de frutuna por Europa (
Babette, Eloïse de Montgrí, German, Reinhardt, Alda, Sigurd y William), Aymar de Bois-Maury jaz compaña a una jarrupiáa de pelegrinos mu probes al treviés d`Hungría, Turquía, etc. jasta Palistina, ondi la suerti atópalu (El selyúcida y Khaled). Gracias al tresoru ganáu a la causalidá, torna a la su tierra a buscu del castillu del quien es heréu. La frutuna que lu jaz compaña fina por dejalu y Aymar de Bois-Maury consigui`l su castillu peru esmana la su vida nel capítulu 10, tituláu Olivier.
D`esta saga surdi otra tituláa Bois-Maury, atal, y que tién a los sus heréos –de siglos derréu- comu protagonistas:
Assunta, Rodrigo y Dulle Griet. Nesti últimu títulu, jaz un homenaji al cuadru homónimu de Pieter Bruegel. Son las hestorias que cuntinan, juera d`época meyeval, a las emprincipiáas pol caballeru Aymar de Bois-Maury.

No hay comentarios: