Emil Torday

A escomencipios del siglu XX, ena selva del Congu, bía un belga que no s`atraía a los demás: Emil Torday. Esti hombri no escarceaba oru ne marfil ne cauchu, ne la trata de negros... Sólu escarceaba información atentu los tiempos pasaos. A buscu d`esi tresoru trespuso cientos de kilómetros pola lera del ríu Congu, enjarbándose nel séquitu d`África. Jue tiraeru pol ríu Kasai y, depués pol Sankuru, allegando a lugaris no aprendíos pol hombri blancu, jasta entós.

Los viejos bushongu acanzábanse de las sus liendas y tradicionis, arrejundiéndo bien el trebaju d`Emil. Amezaos al relate lentu, cuasi jalonáu, los viejos cuntaban las hestorias del su país tasteando cáa parabra. Era entreminabli, era`l su trabaju de viejos. Emil arrecadó la tarja de reis, cientu vainti, jasta`l dios rei que jundó la nación conos sus miragros.

Lo benifestáu polos viejos era despléndidu, peru ¿era verdá u pantesía? ¿Sedría pa datar a daque d`aquellos reis? ¿Sedría p`arrelacionar, cronológicamenti, cona hestoria del mundu hestoriáu? Torday aleaba y siguía hiciendo notacionis, jasta que de súpitu un día:

"Los viejos despusían los jechos mas suliñablis de los diferientis reis", dijo mas tardi, "y n`allegando al nonagésimu otavu rei, Bo Kama Bomanchala, benifestarin que l`únicu jechu importanti del su reináu era que, ciertu día, estando nel meriyanu, el sol apagóse y hebo una escuridá total por una alendáa".

"Sentíu estu, no jui pa controlame: blinqué y blinqué y, quisi jacer un disparati. Los viejos cudaban qu`un escuplión bíame picáu".

"Apasarin dellos mesis enantis d`enterame de la fecha del inclís: el 30 de marzu de 1680 hebo un inclís de sol total, mesmamenti sobri Bushongu..."

"No bía riisgu d`enquivocu, pos aquel inclís jue l`únicu visibli ena región enti los siglos XVII y XVIII."

El méritu de Torday jue librar la "posibilidá" d`una hestoria d`África nel reportoriu de los siglos. Enantis con enantis de l`apareción de la hestoria escrita al móu européu.