Orelie-Antoine de Tounens

El deliriu d`Orelie-Antoine de Tounens era ser ascuegíu comu rei polos araucanos. En 1859 marchó de Francia a la Patagoña col ojetivu de coronase nel tronu araucanu, que dendi la su visual, era una nación de sevia nuéu y ajechu. Allegó a Chile, ondi quedó ena ca d`un amigu masón, supiendo luegu que los araucanos diban nun sen a la batalla final escontra la República. Enantis de morrer, un gran cacique camientó que la final de la guerra y la desclavitú concidiría cona allegáa d`un jolasteru blancu barbudu; en toa manera qu`el juturu rei jue oldeáu y benifestarin una monarquía costitucional. Los patagonis oldearin el su reinu y, Orelie-Antoine de Tounens firmó un decumentu pol que s`anesionaba tol territoriu dendi`l quinociu 42º jasta`l Cabu d`Hornos. Jué la nacencia d`Orelie-Antoine I.

Tornóse a Valparaisu pa jacer una costitución -el su gobiernu estaba jormáu por dellos ministros d`origin francés-, peru, nuevi mesis depués los indios eran endiferintis a los sus anjeos. Decidió acurriar 30.000 guerreros y asganzar pola juerza una linde pal su reinu. Las jumeras indias alertarin a los colonos, que dierin avisu a los melitaris. En 1862 lu apañarin, lu acialarin, procesarin, piesllarin y tratarin comu un bandíu, arrenunciando al su tronu a la juerza -conos indios no hebo tanta cuidu-. El cónsul francés lu sacó de la cárcel y mandólu a Francia.

Tres vegáas intentó tornar al reinu d`Araucaria, y tres vegáas s`estorregarin los sus emplantillamientos. En 1877 atopárinlu meyu muertu nun quirófanu de Güenos Airis, d`aondi un barcu de vafu lu apurrió a Dordoña, a morrer penosamenti; enanque, declinaba sucesor a Gustave Achille la Viarde, el rei Aquiles I.