El juiciu (1)

-¡Qu`el primer tistigu entri!

Un butri, el de la drecha, abrió la puerta y juimos pa ver la escafa menuduca y ligera d`una nuética. Ésta, entró y siguió al butri boyeanti pol carreju. Asentóse y, mirando al públicu y al juez, bujueló conos güejos abiertos comu platos. No paecía mu aseláa. El juez, mu seriu, dijo: "Siñora fiscal, entrugui a la testiga". L`águila negra retrucó: "Cona venia".

-¿Conoz usté al acusáu?

-Sí, conózolu-. Dijo la nuética. -Está hiciéndose mu famosu- Dejó caer.

-¿Cuántu jaz que lu conoz- Cuspetó averándose l`águila negra, entornando`l pezu. Un viecu que ya tinía estudiáu pa botijase.

La nuética miró al juez con cara de no entender náa, peru atopóse cona julganti miráa del corvatu, qu`era pocu amigu de las pájaras que trebajan ena nuechi.

-Dendi la su nacencia- dijo la nuética- ¡Dendi qu`era un güevu!

El fiscal jispió las plumas y hezo sonar las escarbaeras nel suelu, con empacencia. Un burbur de guitu espiblose pola sala. La nuética, viéndose custionáa, siguió col relate.

-La nuechi del 20 de marzu allegó la cuca la su madri volando. Suel vivir nuna cajiga juntana a la mi casa, peru es una "ensín papelis" que vivi la metá l`añu nel ábrigu d`África zanganeando-. El corvatu picó dellas vegáas ena mesa pa galgar el ruíu que ya taba estaláu ena sala.

-Un día- siguió la nuética -yo m`alcontraba aseláa depués de tol labarientu del trebaju de la nuechi, ¡es mu duru sacar alanti a cuatru crías en carnetas! asisque, pa destraeme un pocu, taba mirando pola ventana y, por causalidá, siñoría, vi cómu la madri del acusáu pusía un güevu nel nial de los señoris Colorín. ¡Esi es l`ite d`esti tribiloriu!

El burbur pasó a ser un coloñu de grijos y asparavanes. El bilanu no era pa callar a esi bálamu, que mas qu`un juiciu paecía un gallineru.

Sigui...